Bu gün “Araz-Naxçıvan”da keçirilən klubdaxili iclasda mövsümün ilk yarısında qeydə alınan nəticələr müzakirə olunub və Elmar Baxşıyevin baş məşqçi postunda qalması məqsədəuyğun sayılmayıb. Demək olar ki, onun istefası 95 faiz həll olunmuş məsələdi, hətta “qırmızı-ağlar”ın yeni baş məşqçisi, ukraynalı Andrey Demçenkonun artıq Bakıya gəldiyini iddia edən qaynaqlar da var. Demçenko ilə işim yoxdu, məni düşündürən başqa məqamdı.
“Araz-Naxçıvan” Konfrans Liqasında fiasko yaşayandan sonra Elmar bəy istefaya göndərilsəydi, hardasa anlamaq olardı. Yəni klubun ekstravaqant rəhbəri Zaur Axundov “Omoniya”nın iki oyunda naxçıvanlıların qapısından 9 top keçirməsini bağışlamayıb-filan-filan... Amma indi vəziyyət fərqlidi axı.
Premyer-liqada iki komanda – “Sabah”la “Qarabağ” başqalarından açıq-aşkar üstündü. Yayda avrokuboklara 4 vəsiqədən ikisinin məhz onlara qismət olacağına şübhə etməyə dəyməz. Qalan iki vəsiqə uğrunda isə 4 (“Neftçi”ni də saysaq, 5) komanda – “Zirə”, “Turan Tovuz”, “Sumqayıt” və “Araz-Naxçıvan” mübarizə aparır. Bəli, “qırmızı-ağlar” bu mübarizədə bir addım geridədi, mən onların ölkə kubokunda dayanmasını nəzərdə tuturam. Amma başqa məsələlərdə “Araz-Naxçıvan” əsas rəqiblərindən geri qalmır. Hə, bir ciddi məqam da var: “Zirə”, “Turan Tovuz” və “Sumqayıt” ən azı ev oyunlarını minlərlə azarkeş önündə keçirirsə, “Araz-Naxçıvan” qaçqın həyatı yaşayır və boş tribunalar önündə oynayır. Əli hər yerə çatan Zaur Axundov isə bu problemi həll etmək əvəzinə çıxış yolunu Baxşıyevi istefaya göndərməkdə görür. Bunun adı insafsızlıq, ədalətsizlik və Allahsızlıqdı!
“Araz-Naxçıvan” bu gün 3-cü pillədəki “Zirə”dən iki, 4-5-ci pillələrdəki “Turan Tovuz”la “Sumqayıt”dan bir xal geri qalır, “Şamaxı” ilə “Neftçi”dən isə 6 xal irəlidədi. Bəli, qeyri-sabit nəticələr dönəmi olur, amma Elmar Baxşıyevin komandasının baxımlı oyun göstərmədiyini yalnız axmaqlar iddia edə bilər. “Qırmızı-ağlar” bu mənada da premyer-liqanın əksər iştirakçılarından üstündü.
Bir sözlə, Zaur Axundov bu gün düşünülməmiş və heç nə ilə əsaslandırılmayan qərar verdi. Hətta deyərdim ki, “Araz-Naxçıvan”ın avrokubok şansını bitirdi. Heç bir ədalətsizlik cavabsız qalmır. Baxşıyev bu gün ədalətsiz münasibətlə üzləşdi. Amma onun ölkə futbolunda sözünü demək üçün hələ çoxlu imkanı olacaq.
ORXAN