Premyer-liqada “Arsenal”, “Mançester Siti” və “Liverpul” qələbə qazandı. “Tottenhem”, “Çelsi” və “Mançester Yunayted” büdrədi. “Qırmızı şeytanlar”a qalib gələn “Aston Villa”nın fenomenal seriyası davam edir.

"Football-plus.az" xəbər verir ki, “Everton” – “Arsenal” oyunu baxımlı alınmadı. Moyesin “Everton”u istənilən rəqibə “dişini qıcaya” bilir, bu mənada “topçular” da istisna deyildi.

Meydan sahibləri ilk dəqiqələrdən yüksək mübarizə şəraiti təklif etdi. Ancaq ilk yarının ortalarında heç bir ehtiyac olmadan cərimə meydançasında əllə oynayan O’Brayen komanda yoldaşlarının əməyini yerə vurdu. Dyökereş penaltini inamla yerinə yetirdi. “Arsenal” 2-ci hissədə hesaba görə oynadı, hərçənd dəfələrlə fərqi artırmağa da yaxın oldu. Geyenin yoxluğunda “Everton”un dayaq zonası çox zəif göründü. Sakanın zərbəsindən sonra müdafiəçi topu boş qapıdan çıxardı, Trossarla Subimendinin zərbələri dirəyə tuş gəldi. Final fitinə qədər intriqa qorunsa da, “göylər”in Rayyanı narahat etdiyini demək olmaz. Praqmatik tərzdə qələbəni qoruyan “Arsenal” zirvədə qaldı.

“Topçular”ın ən yaxın izləyicisi isə MS-di. “Şəhərlilər” son illərin ənənəsinə sadiq qalaraq yenə “Vest Hem”i məğlub etdi. Onların total dominantlığı oyunboyu hiss olundu. Holannın vurduğu erkən qol da buna müəyyən mənada şərait yaratdı. Hissənin sonunda meydan sahiblərinin oyun üstünlüyü növbəti qolda əksini tapdı. Oyunun qalan bölümü formallığa çevrildi. “Vest Hem” 2-ci hissədə bir qədər fəallaşsa da, Holannın növbəti qolu hər şeyə aydınlıq gətirdi. 0:3-dən sonra “çəkicdöyənlər” məğlubiyyətlə barışdı. “Siti”nin qələbə seriyası 7 oyuna çatdı. Son 6 turda qələbə qazana bilməyən “Vest Hem” isə elitada qalmaq uğrunda mübarizə aparmalı olacaq.

Hesabat turunda iki mərkəzi oyun da var idi. “Tottenhem” “Liverpul”la oyuna yaxşı başladı, ancaq 33-cü dəqiqədə azlıqda qaldı. Topu almağa çalışarkən ehtiyatsız davranan Simons Van Diykin ayağını tapdaladığına görə vaxtından əvvəl paltardəyişmə otağına yollandı. 2-ci hissədə İsakı meydana buraxan Slot qol istəyinə çatdı. Ancaq isveçli hücumçu tezliklə zədələnib yerini oyundaşına verdi. Hissənin ortalarında “mahmızlar” hesabı bərabərləşdirə bilərdi, ancaq Kolo Muaninin zərbəsindən sonra Kerkezdən səkən top tirə dəydi. Bir neçə dəqiqə sonra “Liverpul” 2-ci qolu da vurdu. Bundan sonra arxayınlaşan “qırmızılar” gözlənilmədən qapısında qol gördü. Künc zərbəsinin ardından yenicə meydana çıxan Rişarlison fərqi azaltdı. 90+3-cü dəqiqədə Romero da meydandan qovuldu və “Tottenhem” 9 nəfərlə qaldı. Belədə asanlıqla qələbəni qoruyan “Liverpul” “ÇL zonası”na yaxınlaşdı.

İnanılmaz sürət yığan “Aston Villa” qarşısına çıxanı əzir. Bu komandanın MY ilə duelinə də “mərkəzi” təyinini yapışdırmaq olardı. Oyuna fəal başlayan Emerinin komandası startda bir neçə yaxşı imkanı boşa verdi. Ardından təşəbbüs “qırmızı şeytanlar”ın tərəfinə keçdi. Mankunianlar hətta meydanın rəqibə aid hissəsində topa nəzarət etsələr də, hücumların kəmiyyəti keyfiyyətə keçmirdi. Birmingemlilər hissənin sonunda Rocersin effektli zərbəsi sayəsində hesabı açdı. Düzdü, Amorimin komandası hələ fasiləyə qədər hesabı bərabərləşdirdi. 2-ci hissənin startı ərəfəsində qonaqlar bəd xəbərə görə üzüldü. Belə ki, Fernandeş zədə üzündən meydana çıxa bilmədi. Onun yoxluğunda qonaqların hücum potensialı ciddi şəkildə azaldı. Üstəlik Mbemo ilə Dyallonun Afrika Millətlər Kubokuna qatıldığını da unutmayaq. Məhz kadr qıtlığına görə Amorimin oyunun axarına müdaxilə etmək imkanı yox idi. Halbuki mankunianlar buna ehtiyac duyurdu. Axı 2-ci hissənin əvvəlində Rocers növbəti dəfə komandasını irəli çıxarmışdı. MY-nin vəziyyəti düzəltmək üçün o qədər çox vaxtı yox idi. 2-ci hissənin ortalarında Kunya fərqlənə bilərdi, ancaq əla mövqedən “çərçivə”yə düşmədi. MY-nin oyunçularının ifasında sonda təzyiq dalğası da görmədik. “Qırmızı şeytanlar”ın çempionatdakı məğlubiyyətsiz oyunlar seriyası 4-də dayandı. “Aston Villa” isə 4-cü yerdə qərarlaşan “Çelsi”dən artıq 7 xal irəlidədi.

Turun açılış oyununda məhz “zadəganlar” meydana çıxdı. “Nyukasl”ın ev oyunlarını keçirdiyi “Sent-Ceyms Park”da ardıcıl dörd dəfə uduzan “Çelsi” yenə məğlubiyyətə yaxın idi. İlk yarı tam “sağsağanlar”ın üstünlüyü şəraitində keçdi. Artıq 4-cü dəqiqədə Voltemade onları irəli çıxardı. Almaniyalı hücumçu 20-ci dəqiqədə ikinci qolu da vurdu. Əslində “Nyukasl” fasiləyə qədər oyunun taleyini həll etməliydi. Sadəcə, referi Endi Medli topun Fofananın əlinə dəydiyi epizodda “nöqtə”ni göstərmədi, Voltemade də het-trik şansını qaçırdı. Belə durumda fasilə qonaqların işinə yaradı. Ceymsin 49-cu dəqiqədə cərimə zərbəsindən vurduğu gözəl qol onları bir qədər də ruhlandırdı. Artıq hissənin ortalarında Pedro hesabı bərabərləşdirdi. Özü də məhsuldar ötürməni ona qapıçı Sançes verdi. Bundan sonra oyun qarşılıqlı hücumlar şəraitində davam etdi. Hər iki komandanın hesabı dəyişmək şansı var idi. Məhsuldar heç-heçə tərəflərdən heç birini razı salmadı. “Nyukasl” “Çelsi” ilə xal fərqini 3-ə endirə bilmədi, üstəlik “Liverpul” da “zadəganlar”a çatdı.
Mövsümün kəşflərindən olan “Sanderlend”in də “Çelsi”yə çatmaq imkanı var idi. Amma “qara pişiklər” səfərdə “Brayton”un müqavimətini qıra bilmədi.

Turun qalan oyunlarına gəlincə, “Bornmut”la “Bernli” “sülh”ə razılaşdı, “Vulverhempton” evdə “Brentford”a uduzdu, “Lids” isə “Kristal Pelas”ı darmadağın etdi.

17-ci tur
Tottenhem – Liverpul 1:2
Rişarlison, 83 – İsak, 56. Ekitike, 66. (61138)
Tottenhem: Vikario, Porro, Romero, Van de Ven, Spens, Bentankur, Qrey (Palyinya, 71), Kudus (Conson, 58), Berqvall (Odober, 71), Simons, Kolo-Muani (Rişarlison, 80).
Liverpul: Alisson, Bredli (İsak, 46/Frimponq, 60), Konate, Van Diyk, Kerkez, Qravenberx, Cons, Soboslai, Makallister, Virts (Nyoni, 90+10), Ekitike (Robertson, 90+9).

Mançester Siti – Vest Hem 3:0
Holann, 5; 69. Reynders, 38. (52454)
MS: Donnarumma, Nunyeş, Diaş, Qvardiol, O’Rayli, B.Silva (Mukasa, 75), Niko (Xusanov, 67), Reynders (Lüis, 67), Şerki (Savinyo, 67), Foden, Holann.

Nyukasl – Çelsi 2:2
Voltemade, 4; 20 – Ceyms, 49. Pedro, 66. (52226)
Çelsi: Sançes, Hüsto (Fernandes, 54), Fofana, Çaloba, Kukurelya, Ceyms, Kaysedo, Neto, Palmer (Santos, 79), Qarnaço, Pedro.

Everton – Arsenal 0:1
Dyökereş, 27-p. (52335)
Arsenal: Rayya, Timber, Saliba, İnkapye, Kalafyori, Edeqor (Merino, 88), Subimendi, Rays, Saka, Dyökereş (Jezus, 65), Trossar (Martinelli, 80).

Aston Villa – Mançester Yunayted 2:1
Rocers, 45; 58 – Kunya, 45+3. (43157)
MY: Lammens, Yoro (Leysi, 85), Heven, Şou, Dalot, Uqarte (Zirkzee, 73), Fernandeş (Martines, 46), Dorqu, Kunya, Maunt, Şeşko (Fletçer, 73).

Bornmut – Bernli 1:1
Semenyo, 67 – Broya, 90. (10762)

Brayton – Sanderlend 0:0
(31426)

Vulverhempton – Brentford 0:2
Lüis-Potter, 63; 83. (27662)

Lids – Kristal Pelas 4:1
Kalvert-Lüin, 38; 45+4. Ampadu, 60. Stax, 90+11 – Devenni, 90+2-p. (36334)

Fulhem – Nottingem Forest 1:0
Ximenes, 45+5-p.

1. Arsenal 17 12 3 2 31-10 39
2. Mançester S. 17 12 1 4 41-16 37
3. Aston Villa 17 11 3 3 27-18 36
4. Çelsi 17 8 5 4 29-17 29
5. Liverpul 17 9 2 6 28-25 29
6. Sanderlend 17 7 6 4 19-17 27
7. Mançester Y. 17 7 5 5 31-28 26
8. Kristal Pelas 17 7 5 5 21-19 26
9. Brayton 17 6 6 5 25-23 24
10. Everton 17 7 3 7 18-20 24
11. Nyukasl 17 6 5 6 23-22 23
12. Brentford 17 7 2 8 24-25 23
13. Fulhem 17 7 2 8 24-26 23
14. Tottenhem 17 6 4 7 26-23 22
15. Bornmut 17 5 7 5 26-29 22
16. Lids 17 5 4 8 24-31 19
17. Nottingem F. 17 5 3 9 17-26 18
18. Vest Hem 17 3 4 10 19-35 13
19. Bernli 17 3 2 12 19-34 11
20. Vulverhempton 17 0 2 15 9-37 2

Bombardirlər: Holann (MS) – 19, Tyaqo (Brentford) – 11, Semenyo (Bornmut), Ekitike (Liverpul) - 8.

Növbəti turun oyunları dekabrın 26-28-i aralığında keçiriləcək: Mançester Yunayted – Nyukasl, Nottingem Forest – Mançester Siti, Arsenal – Brayton, Bernli – Everton, Brentford – Bornmut, Vest Hem – Fulhem, Liverpul – Vulverhempton, Çelsi – Aston Villa, Sanderlend – Lids, Kristal Pelas – Tottenhem.

Turun rəqəmi
10 – “Aston Villa”nın bütün turnirləri əhatə edən qələbə seriyası 10 oyuna çatdı. Birmingemlilər premyer-liqada ardıcıl 7, Avropa Liqasında 3 qələbə qazanıb. Sonuncu dəfə noyabrın 1-də “Liverpul”a uduzan (0:2) “Aston Villa” 111 illik fasilədən sonra belə uğurlu seriya yaxalayıb. 1914-cü ildə də ardıcıl 10 qələbə olmuşdu.

Turun ulduzu
Morqan Rocers (Aston Villa) – ardıcıl ikinci oyunda komandasının qəhrəmanı oldu. 23 yaşlı futbolçu “Vest Hem”lə oyunda da dubl etmişdi. MY-nin qapısına hər iki qolu cərimə meydançasının xaricindən zərbə ilə vurdu. 7 qol vuran Rocers komandasının çempionatda bombardiridi.

Turun sitatı
Üqo Ekitike, “Liverpul”un hücumçusu:

Faktlar
* Holann premyer-liqada qol sayına görə Kriştiano Ronaldonu arxada qoydu. MS-nin hücumçusu bu liqada keçirdiyi 114-cü oyunda qol sayını 104-ə çatdırdı. Ronaldo MY-nin heyətində premyer-liqada 103 qol vurub. Amma portuqaliyalı norveçlidən 122 oyun çox keçirib.
* Holann premyer-liqada Milada (İngiltərədə dekabrın 25-də qeyd olunur – red.) qədər 19 qol vurmağı bacardı. Ona qədər Endi Koul (1993/94, “Nyukasl”), Kevin Fillips (1999/00, “Sanderlend”) və Luis Suares (2013/14, “Liverpul”) eyni nəticəni göstərib.
* “Vulverhempton” “Derbi”nin premyer-liqadakı antirekordunu təkrarlaya bilər. 17 turdan sonra “canavarlar”ın hesabında cəmi 2 xal var. İndiyə qədər premyer-liqa tarixində ən pis nəticəni 2007/08 mövsümündə “Derbi” göstərib – 11 xal. Onda həmin komandanın 17 turdan sonra 6 xalı var idi.

Oyundan sonra
Arne Slot, “Liverpul”un baş məşqçisi:

Mikel Arteta, “Arsenal”ın baş məşqçisi:
Ruben Amorim, MY-nin baş məşqçisi: