Premyer-liqada çərşənbə axşamı 15-ci tur start götürdü.

"Football-plus.az" xəbər verir ki, nəhənglərdən “Arsenal” “Luton”un qonağı oldu. Lap tutaq ki, meydandakı oyunun keyfiyyətindən narazılıq etmək mümkündü. Ancaq dramaturgiya və qol sayı hər kəsin xoşuna gəldi. Çox güman, aşkar autsayderlərdən birinin liderə belə müqavimət göstərəcəyini heç kim gözləmirdi. Yəqin lider özü də rəqibə bir qədər saymazyana münasibət göstərdi. Hər halda, “Arsenal” artıq 20-ci dəqiqədə Martinellinin qolu ilə önə çıxdı. Cəmi 5 dəqiqə sonra – elə ilk künc zərbəsində “Luton” hesabı bərabərləşdirdi. “Topçular” fasilə ərəfəsində 2-ci qolu vurdu. Amma yenə qonaqların üstünlüyü uzun sürmədi. İkinci hissə başlayan kimi Adebayo “status-kvo”nu bərpa etdi. Barkli 57-ci dəqiqədə meydan sahiblərini irəli çıxaranda isə sensasiyanın qoxusu gəlməyə başladı. Yeri gəlmişkən, qapıçı Rayya iki qolda kobud səhvə yol verdi. Bununla belə, oyundaşları onun qınaqla üzləşməməsi üçün əlindən gələni etdi. “Topçular” dərhal 3-cü qolu vurdular. “Luton” qələbə hesabını qorumaq üçün inadla və cəsarətlə çalışdı. Hakim oyuna 6 dəqiqə əlavə etdi. Ancaq 7-ci dəqiqədə qonaqlar qapıya yol tapmaqla qələbə seriyasını 6-ya çatdırdı.

Çərşənbə axşamı keçirilən digər oyunda “Vulverhempton” aşkar autsayder “Bernli”ni minimal hesabla məğlub etdi.

15-ci tur
Luton – Arsenal 3:4
Oşo, 25. Adebayo, 49. Barkli, 57 – Martinelli, 20. Jezus, 45. Haverts, 60. Rays, 90+7.
Arsenal: Rayya, Kivyor (Zinçenko, 64), Qabriel, Saliba, Uayt, Edeqor, Rays, Haverts, Martinelli (Trossar, 64), Jezus, Saka.
Vulverhempton – Bernli 1:0
Hi Çan Hvan, 42.
Şeffild Yunayted – Liverpul 0:2
Van Diyk, 37. Soboslai, 90+5.
Aston Villa – Mançester Siti 1:0
Beyli, 74.
Mançester Yunayted – Çelsi 2:1
Maktominey, 19; 69 – Palmer, 45.
Brayton – Brentford 2:1
Qross, 31. Hinşelvud, 52 – Mbeumo, 27-p.
Fulhem – Nottingem Forest 5:0
İvobi, 30; 74. Ximenes, 34; 54. Kerni, 86.
Kristal Pelas – Bornmut 0:2
Senesi, 25. Mur, 90+2.
“Everton” – “Nyukasl”, “Tottenhem” – “Vest Hem” oyunları bu gün keçiriləcək.

1. Arsenal 15 11 3 1 33-14 36
2. Liverpul 15 10 4 1 34-14 34
3. Aston Villa 15 10 2 3 34-20 32
4. Mançester S. 15 9 3 3 36-17 30
5. Tottenhem 14 8 3 3 28-20 27
6. Mançester Y. 15 9 0 6 18-18 27
7. Nyukasl 14 8 2 4 32-14 26
8. Brayton 15 7 4 4 32-27 25
9. Vest Hem 14 6 3 5 24-24 21
10. Çelsi 15 5 4 6 26-24 19
11. Brentford 15 5 4 6 23-21 19
12. Fulhem 15 5 3 7 21-26 18
13. Vulverhempton 15 5 3 7 20-25 18
14. Kristal Pelas 15 4 4 7 14-21 16
15. Bornmut 15 4 4 7 18-30 16
16. Nottingem F. 15 3 4 8 16-27 13
17. Luton 15 2 3 10 16-30 9
18. Everton (-10) 14 5 2 7 15-20 7
19. Bernli 15 2 1 12 15-33 7
20. Şeffild Y. 15 1 2 12 11-41 5
Bombardirlər: Holann (MS) – 14, Salah (Liverpul) - 10, Son Hın Min (Tottenhem) – 9.

Oyundan sonra
Mikel Arteta, “Arsenal”ın baş məşqçisi: “Çox şadam. Burda böyük savaşın olacağını bilirdik. Qollar buraxmaqla işimizi çətinləşdirdik. Komanda ruhu göstərdik, mübarizə apardıq, lazımi anlarda özümüzü göstərdik və əsas odu ki, heç vaxt təslim olmadıq. Qələbə əhval-ruhiyyəsindəydik və bunun mükafatını aldıq. “Luton”un haqqını vermək lazımdı. Hücumları əla bitirirdilər, bunu qiymətləndirməmək olmaz. Rəqibin ünvanına böyük tərif düşür. Rayyanın oyununa gəlincə, mən komandamdam razıyam. Bütün futbolçularla danışdım, sevincdən göyün yeddinci qatındadılar. Bu gün mən çox xoşbəxt məşqçiyəm”.