Türkiyə futbolunda oyunlara pul qoyuluşu edilməsi ilə bağlı qalmaqal nəinki tam sürətlə davam edir hətta tədricən yeni mərhələyə yüksəlir.

"Football-plus.az" xəbər verir ki, ötən həftə aralarında sabiq hakim Ahmet Çakar, eləcə də ''Fənərbaxça''nın üzvü Mərt Hakan Yandaş, ''Qalatasaray''lı Metehan Baltacı, FİFA hakimi Zorbay Küçük, ''Adana Dəmirspor''un sabiq başqanı Murat Sancak, ''Konyaspor''lu Alassan Ndao da daxil olmaqla 46 nəfərin saxlanıldığını xəbər vermişdik.

Onlar Növbətçi Sülh Cəza Məhkəməsinə çıxarılıblar. Prokurorluğun araşdırması zamanı ortaya şok faktlar çıxıb. ''Fənər''in kapitanlarından biri olan Mərt Hakan Yandaşın köhnə tanışı Ərsən Dikmən adlı şəxsə 2021 dekabr - 2025 oktyabr aralığında ümumilikdə 4,5 milyon lirəyə yaxın pul göndərdiyi məlum olub. Ərsən Dikmən bu pulları hər dəfə qəbul edən kimi bukmeker kontorlarına yatırırmış. Dikmən tərəfindən Mərtə 2 milyon lirədən çox pul qaytarılıb.

Ən maraqlısı odu ki, yaradılan kuponlarda ''Fənərbaxça''ya aid də pul qoyuluşları edilib. Qoyuluşlar həm qanuni, həm də qeyri-qanuni saytlarda edilib. Araşdırma zamanı məlum olub ki, Ərsən Dikmən ''İsmayıl Yüksək ən azı 3 dəfə qaydanı pozacaq'' və ''İsmayıl Yüksək sarı vərəqə alacaq'' kimi mərclərə pul qoyub.

Xatırladaq ki, İsmayıl Yüksək ''Fənər''in və Türkiyə yığmasının dayaq yarımmüdafiəçisidi. Mərt Hakan Yandaş açıqlamasında Ərsən Dikməni 10 ildən çoxdu tanıdığını bildirib. Aşağı liqalarda oynayarkən və gəliri az olarkən Dikmənin ona maddi yardım etdiyini deyib. Pandemiyadan sonra isə Dikmənin işləri zəiflədiyindən və həmin vaxt artıq Mərt özü böyük pullar qazanmağa başladığından o, Dikmənə maddi yardım göstərməyə başladığını deyib. Göndərdiyi pulların isə hara xərclənməsindən xəbərsiz olduğunu vurğulayıb. Amma bu, yalandı. Çünki ikili arasındakı ''vatsapp'' yazışmalarında dəfələrlə müxtəlif oyunlara pul qoyuluşları müzakirə olunub.

Metehan Baltacı barədə iddialar da maraq doğurur. Bu futbolçu həm ''Qalatasaray'', həm də ''Eyüpspor''da oynadığı dönəmdə bir kupona maksimum 1800 lirə pul atmaqla ümumilikdə 36 kupon yazıb. Bunlardan 5-i qazanıb. O, ''Qalatasaray''ın öz oyunlarına da pul atıb. ''Qalatasaray''ın qələbəsi və ''Qalatasaray''ın oyununda 2,5 üst qol olacaq kimi mərc qoyuluşları edib. Həmin qarşılaşmalarda o özü iştirak etməyib və adı iştirak ərizəsinə salınmayıb.

Qeyd edək ki, başqa futbolçuların da öz klublarına pul qoyuluşu etməsi faktı aşkarlanıb. Məsələn, Muhammed Furkan Özhan adlı futbolçu ''Ərzurumspor''da oynadığı dönəmdə bu klubun bir oyununa ''qarşılıqlı qol olacaq və bərabərlik qeydə alınacaq'' mərcinə pul atıb.

Məhkəmə qarşısına çıxarılanlardan 20-nin həbs olunmasına qərar verilib. Onların arasında Mərt Hakan Yandaş, Metehan Baltacı, Murat Sancak və Alassan Ndao da var. ''Konyaspor'' Ndao ilə müqaviləni ləğv edib. Ahmet Çakar və Zorbay Küçük də daxil olmaqla 19 nəfər isə sərbəst buraxılıb.