Türkiyədə qeyri-qanuni pul qoyuluşlarına qarşı keçirilən ''təmiz əllər'' adlı əməliyyatda yeni xəbər var.

Məlum olduğu kimi federasiya tərəfindən mərc oynamaqda günahlandırılan 152 hakimdən 149-u 8-10-12 aylığa futboldan kənarlaşdırılmışdı. Daha sonra İstanbul Baş Prokurorluğü 17 hakim və eləcə də ''Eyüpspor'' prezidenti Murat Özkaya da daxil olmaqla 21 nəfərin həbs olunmasına qərar vermişdi.

Bu arada durumu araşdırılan və hələ ki, cəza almayan 3 hakimdən biri olan Zorbay Küçükün bu məsələdən üzüağ çıxmağa yaxın olduğu bildirib. Bu xəbəri son köşə yazısında jurnalist Murat Özbostan açıqlayıb.

Xatırladaq ki, FİFA referisi statusunda olan Zorbay Küçük bu qalmaqalın üstü açıldıqdan sonra özü prokurorluğa gələrək şikayət etmişdi. O, heç bir mərc saytında hesabının olmadığını və heç vaxt pul qoyuluşu etmədiyini bildirmişdi. Küçük onun şəxsiyyət vəsiqəsi ilə başqası tərəfindən adına mərc hesabı açıldığını iddia etmişdi. Prokurorluğun araşdırması zamanı bu fakt demək olar, təsdiqini tapıb. Çünki Küçükün adına açılan hesabda istifadə olunan telefon nömrəsi və bank hesabının ona məxsus olmadığı üzə çıxıb. Prokurorluğun bu hakimlə bağlı ən qısa zamanda rəsmi açıqlama verəcəyi gözlənilir. Küçük federasiya tərəfindən əfv olunacağı təqdirdə ona artıq növbəti həftə oyun verilə bilər.

Bu arada qarşıdakı günlərdə mərc qoyuluşu etməkdə günahlandırılan futbolçularla bağlı da yeni olayların yaşanacağı gözlənilir. Ümumilikdə 3700-ə yaxın peşəkar futbolçunun adı hallanır. Onların da bir-bir adları açıqlanacaq və hər biri Nizam-İntizam Komitəsinə sövq ediləcək. Bu futbolçular arasında 4 nəhəng klubda oynayanların olub-olmadığı barədə məlumat verilmir.