“Beşiktaş” qış transfer dönəmində təkcə Rafa Silva ilə yox, həm də Temmi Abraham ilə yolları ayıra bilər. İstanbul nəhəngi hücumu gücləndirmək barədə ciddi düşünür.

"Football-plus.az" xəbər verir ki, “qartal” Abrahamın icarə haqqı kimi yayda 2 milyon avro ödəyib. Mövsümün sonunda isə daha 13 milyon avro ödəyərək onu daimi əsasda transfer etməli olacaq. Çünki müqavilədə məcburi transfer maddəsi var. Üstəlik Abrahamın maaşı 6 milyon avrodu.

Əslində 28 yaşlı ingiltərəli forvardın göstəriciləri o qədər də pis deyil. O, indiyə qədər 20 rəsmi oyunda 10 qol vurub. Amma fanatlar, eləcə də baş məşqçis Sərgən Yalçın Abrahamın performansından narazıdı. İngiltərə və Rusiyadan təkliflər alan futbolçu hələlik diqqətini ilin sonuna qədər keçiriləcək üç matça yönəldib. Son oyunda ehtiyatda qalan Abrahamın qarşıdakı matçlarda performansının necə olacağı maraq doğurur.

“Sabah” nəşrinə inansaq, “Beşiktaş” qış fasiləsində 15 milyon avroluq təklif alacağı təqdirdə bu futbolçunun satışına razılıq verəcək. “Ağ-qaralar”ın skautlarının hücumçu axtarışı davam edir. “A Spor” kanalının paylaşdığı xəbərə görə, “Beşiktaş” “Loryan”ın forvardı Sambu Sumanonu diqqət mərkləzində saxlayır. “Loryan”ın ötən tur “Nitsa”nı 3:1 yendiyi qarşılaşmanı “Beşiktaş”ın iki skautu izləyibmiş. Sumano həmin oyunda dubl edib. Özü də sürəti, driblinqi və universallığı ilə diqqəti çəkən seneqallı hücumçunun “Loryan”la müqaviləsinin müddəti mövsümün sonunda başa çatır.

28 yaşlı futbolçu bu mövsüm Liqa-1-də 14 qarşılaşmada hesabına 4 qol, 2 məhsuldar ötürmə yazıb.