Türkiyə Futbol Federasiyasının nəzdində fəaliyyət göstərən Apellyasiya Komitəsi (AK) ''Qalatasaray''lı Ərən Elmalı ilə bağlı qərarını açıqlayıb.

"Football-plus.az" xəbər verir ki, oyunlara pul qoyuluşu qalmaqalı zamanı Nizam-İntizam Komitəsinə sövq edilən ''Cim-Bom''un üzvü 45 günlüyə futboldan kənarlaşdırılmışdı. Ərən özü də paylaşımında karyerasının ilk illərində pul qoyuluşu etdiyini etiraf etmişdi. Amma bunun qanuna zidd olduğunu öyrəndikdən sonra bu işdən əl çəkdiyini bildirmişdi. ''Qalatasaray'' cəza ilə razılaşmayaraq apellyasiya vermişdi. Amma AK üzvləri arasında keçirilən səsvermədə NİK-in qərarı səs çoxluğu ilə qüvvədə saxlanılıb!

Bu da o deməkdi ki, noyabrın 13-də cəzalanan 25 yaşlı müdafiəçi hələ dekabrın sonlarına qədər meydana çıxa bilməyəcək. Qeyd edək ki, bu qərar avrokubok matçlarına da aid edilir. Bu üzdən Ərən Çempionlar Liqasında ''Yunion''a qarşı son oyunda da ''Qalatasaray''a yardım edə bilmədi.