Azərbaycanın aparıcı qrossmeysteri Şəhriyar Məmmədyarov yenilənmiş dünya reytinqində mövqeyini zəiflədib, Ülviyyə Fətəliyeva isə şəxsi rekorduna imza atıb. Beynəlxalq Şahmat Federasiyası (FIDE) dekabrın 1-nə olan dünya reytinqini açıqlayıb. Şəhriyar Məmmədyarov 2730 xalla 14-cü pillədən 19-cu yerə enib.

Dünya reytinqinin ilk “100-lüy”ündə yer alan digər azərbaycanlı şahmatçılar: Teymur Rəcəbov (2692) - 37-ci yer, Rauf Məmmədov (2645) - 78-ci yer, Eltac Səfərli (2644) – 79-cu yer və Aydın Süleymanlı (2628) - 99-cu yer. İlk üç pillədə Maqnus Karlsen (Norveç, 2840), Hikaru Nakamura (ABŞ, 2810) və Fabiano Karuana (ABŞ, 2795) qərarlaşıb.

Qadın şahmatçılar arasında Ülviyyə Fətəliyevaya şəxsi rekordunu yeniləyərək 26-cı pilləyə yüksəlib. Onun hesabında hazırda 2434 xal var. Qeyd edək ki, bütün dövrlər ərzində azərbaycanlı qadın şahmatçılar arasında ən yüksək nəticə Gülay Məmmədzadəyə məxsusdu. O, 2022-ci ilin oktyabrında 2483 xalla dünya reytinqində 18-ci yerdə qərarlaşmışdı. Hazırda isə Məmmədzadə analıq məzuniyyətində olduğundan 2390 xalla 54-cü yerdədi.

Qadınlar arasındakı reytinqinin ilk “100-lüy”ündə yer alan digər azərbaycanlı şahmatçılar: Gülhər Beydullayeva (2364) – 77-ci yer, Xanım Balacayeva (2351) – 92-ci yer. Qadınlar arasında ilk üç pillədə çinlilər - Hou İfan (2620), Sziner Szyu (2579) və Ley Tinsze (2569) qərarlaşıb.