Azərbaycan şahmatçısı Şəhriyar Məmmədyarov Beynəlxalq Şahmat Federasiyasının (FIDE) reytinqində üç pillə irəliləyib.

39 yaşlı qrossmeyster noyabr ayı üçün tərtib olunan siyahıda 2738 əmsalla 15-ci pillədə qərarlaşıb. İki sıra geriləyən Teymur Rəcəbov (2698) 33-cü yerdədi. Rauf Məmmədovun (2651) da mövqeyində dəyişiklik baş verib. O, 90-ci pillədən 82-ci pilləyə yüksəlib. Ötən ay siyahıda yer alan Aydın Süleymanlı isə "100-lük"dən kənarda qalıb. Kişilərin reytinq siyahısına norveçli Maqnus Karlsen (2831) başçılıq edir. ABŞ təmsilçisi Fabiano Karuana (2805) ikinci, bu ölkənin digər şahmatçısı Hikaru Nakamura (2802) üçüncüdü.

Qadın şahmatçılarımızdan Günay Məmmədzadə (2417) 39-cu, Gövhər Beydullayeva (2403) 44-cü, Ülviyyə Fətəliyeva (2381) 65-ci, Xanım Balacayeva (2362) isə 79-cu pillədə yer alıb. Burda ilk üç pillədə çinli şahmatçılar - Yifan Hou (2633), Venyun Yu (2563) və Zonqyi Tan (2551) qərarlaşıb.