Məlum olduğu kimi böyük maraqla gözlənilən Türkiyə futbolunun bir nömrəli derbisində qalib müəyyənləşmədi.

"Football-plus.az" xəbər verir ki, ''Qalatasaray'' ''Fənərbaxça'' ilə səfər oyununda yenə qələbəyə yaxın olsa da, son anlarda 3 xalı əldən verdi və görüş 1:1 hesabı ilə yekunlaşdı. Bu arada ''Qalatasaray'' cəbhəsinin hakim Yasin Kola olan etirazı davam edir. İstanbul nəhəngi FİFA referisi statusunda olmayan, amma son dönəmlərdə tez-tez derbilərə təyinat alan bu ədalət təmsilçisinin idarəçiliyindən kəskin narazıdı. Bunu hələ oyunsonrası mətbuat konfransında baş məşqçi Okan Buruk, eləcə də jurnalistlərlə söhbətdə klubun ikinci başqanı Mətin Öztürk dilə gətirmişdi.

Dekabrın 2-də, yəni derbinin ertəsi günü isə ''sarı-qırmızılar''ın başqan vəkili Abdulla Kavukçu Türkiyə Futbol Federasiyasının prezidenti İbrahim Hacıosmanoğlunu ziyarət edib. Təxminən 2 saat davam edən ziyarətdə Kavukçu Yasin Koldan ciddi şikayətlər səsləndirib. O, klub tərəfindən Kolun derbidə birmənalı qarşılanmayan qərarlarına dair hazırlanan 10 dəqiqəlik videonu federasiya prezidentinə təqdim edib. Ən əsası ''Qalatasaray'' Hacıosmanoğludan Yasin Kolun bir daha onların oyununa təyinat almamasını, eləcə də bu hakimin karyerasının bitirilməsini tələb edib.