“Qalatasaray” başqanı TFF başqanını məhkəməyə verdi!
“Qalatasaray”la Türkiyə Futbol Federasiyasının münasibətləri son günlər kəskin dərəcədə pisləşib.
Hər şey İstanbul nəhənginin evdə “Eyüpspor”a qarşı oyunundan (2:2) sonra başladı. Başqan Dursun Özbək həm oyunun bazar gününə salınması, həm də matça daha öncə Okan Buruk tərəfindən təhdid eilən gənc hakim Oğuzhan Çakırın təyinat alması üzündən federasiyanı sərt sözlərlə tənqid etdi. Federasiya başqanı İbrahim Haıcosmanoğlu isə “TRT Spor” kanalının canlı yayınında, necə deyərlər, ağzını açıb, gözünü yumdu. Hacıosmanoğlu “köhnə dəftərləri” açaraq onu FETÖ-çü olmaqla günahlandıran şəxslərin “Qalatasaray”lı olduğunu və həmin adamların bilərəkdən sosial şəbəkələrdə köhnə görüntüləri paylaşdığını dedi. Dursun Özbəyi səsləndirdiyi ittihamları sübut etməyə çağıran federasiya prezidenti “sübut etməsən, bunun cavabı çox ağır olacaq. Artıq mənim gözümdə Dursun Özbəyin heç bir hörməti qalmayıb” ifadələrini də işlətdi.
Bu sözlərdən dərhal sonra “Qalatasaray” rəsmi saytında bəyanat yayaraq Hacıosmanoğlunu istefaya dəvət etdi. “Cim-Bom” bununla kifayətlənmədi. Özbək özü şəxsən Çağlayan Ədliyəsinə gedərək Hacıosmanoğlunu məhkəməyə verdi! Ədliyənin çıxışında Özbək jurnalistlərə bunları dedi:
“Hacısomanoğlu “TRT Spor”da qatıldığı bir verilişdə mənimlə bağlı təhdid dolu açıqlamalar verdi. “Qalatasaray”ın prezidentinə edilən təhdid bütün camiəyə edilmiş təhdiddi. Ona görə də ondan Cümhuriyyət Prokurorluğuna şikayət etdim. Türkiyə hüququnun bu məsələdə lazım olanı edəcəyinə əminəm. Biz onu istefaya dəvət etməklə mövqeyimizi ortaya qoyduq. Artıq bu federasiyaya güvənmirik. Düzdü, seçkidə biz də bu rəhbərliyə səs vermişdik. Amma bu prezidentin seçildikdən sonrakı ədalətsiz addımları, işlətdiyi ifadələr “Qalatasaray” camiəsini, eləcə də futbol ictimaiyyətini narahat etməyə başladı. Bu məsələ ilə bağlı bütün fikirlərimi prokurora açıqladım. Onların da lazım olanı edəcəyinə əminəm. Çempionluq yarışında komandamıza güvənirəm. Heç bir narahatlığım yoxdu. Camiəmizin dəstəyi ilə çempionluq yürüşümüz davam edəcək”.
Digər xəbərlər
