“5 metrdən altı epizod qaçırırsansa, nələrisə dəyişmək lazımdı”
1-ci liqada mübarizə apardığı ilk bu mövsümdəcə qarşısına çempion olub elitaya qayıtmaq məqsədi qoyan “Səbail” “Baku Sportinq”lə səfər heç-heçəsinin ardından doğma azarkeşləri önündə “Cəbrayıl”a uduzdu. Bununla da “dənizçilər”lə “Şəfa” arasındakı xal fərqi 5-ə çatdı. Oyundan sonra klub rəhbərliyi baş məşqçi Elvin Məmmədovun qarşılılıq razılıq əsasında istefaya göndərildiyini açıqladı.
Ümumiyyətlə, Bayıl təmsilçisi bu oyunda niyə məğlub oldu? Cavid Hüseynovun “Cəbrayıl”ın rəhbərlərindən biri olması bu nəticənin alınmasında hansı rolu oynadı? Axı deyilənə görə, Cavid Hüseynov “Səbail”dən ayrılandan sonra onun yerini tutan Elvin Məmmədovla arada müəyyən prinsipiallıq var. Ümumiyyətlə, cəmi 9 turdan sonra belə qərar vermək nə dərəcədə düzgündü?
Elvin Məmmədov “Futbol+”in suallarını belə cavabladı:
“Bu deyilənlərin hamısı boş-boş şeylərdi. Cavidlə aramızda əvvəlki səmimiyyət hələ də var. Biz çempionluğa oynayırıq deyə, təkcə “Cəbrayıl” yox, bütün komandalar bizə qarşı daha aqressiv və ciddi oynayır. Normal haldı. Hamı özünü sübut etmək istəyir. Oyun baxımından da “Şəfa”dan geri qalmırıq. Bəlli yol cızmışıq, nə qədər düz, nə qədər səhvdi – bu başqa mövzudu. Böyük fərq də yox idi. İndiki durum bunu tələb edirdi. 5 metrdən altı epizod qaçırırsansa, nələrisə dəyişmək lazımdı. Oyundan sonra rəhbərliklə danışdıq. Sağ olsunlar, bir-birimizi başa düşdük. Tam səmimi qərar verdik. Məşqçi işi belədi, hər şeyə hazır olmalıyıq. Hələ öyrənməliyik, üzərimizdə çox işləməliyik”.
MÜZƏFFƏR QULUZADƏ
Digər xəbərlər
