“Neftçi”yə məğlubiyyətin ardından “Səbail”in “sükanı arxasına” keçən Elvin Məmmədov debüt oyunundan xalla ayrıldı. Əslində Məmmədovun yaxşı nəticə göstərməsi üçün əlverişli şərait yaranmışdı. O, yığmaların oyunları üçün yaranan fasilədən müxtəlif taktiki sxemləri sınaqdan keçirmək imkanı kimi yararlanmalıydı.

Tovuz şəhər stadionunda keçirilən “Kəpəz”lə qarşılaşmada ilk yarıda hesabda geri düşən “dənizçilər” 2-ci hissədə bərabərlik qolu ilə bir xal qazandılar. Bəs qənaətbəxş oyun göstərib nəticə qazanmaqda çətinlik çəkən Cavid Hüseynovla Elvin Məmmədovun fərqi nədi? Məmmədov heyətdə hansı dəyişiklikləri etdi? Onun debüt oyunu ilə Hüseynovun “istefa” oyunu – bunlar arasında ilk “11-lik” baxımından hansı fərqlər var?

Hər ikisi qapını gənc, inamlı, hətta artıq yığmaya da dəvət alan Əlirza Müştəbazadəyə tapşırıb. Habelə Litvin, Nikoliç, Sofir, Rüfət Abdullazadə, Çəlik, Fərid Nəbiyev hər iki məşqçinin ortaq seçimi olub. Elvin Məmmədov təxminən iki ildi futboldan uzaq olan Mirabdulla Abbasov, İlkin Muradov, Nihad Quliyev və Madi Keta seçimlərini də edib ki, onlar “Neftçi” ilə oyunda Hüseynovun “11-liy”ində görünməyiblər.

“Kəpəz”lə oyunun ilk yarısı bərabər səviyyədə keçsə də, 2-ci hissədə diqtə edən tərəf “Səbail” idi. Oyun üslubu baxımından Elvin Məmmədovla Cavid Hüseynovun komandaları arasında elə bir ciddi fərqi olduğunu deyə bilmərik. Qarşıda 8 oyun və 5 xallıq fərq var. Deyə biləcəyimiz bir söz var: “Səbail”in işi çox çətindi, “dənizçilər” boğulur...

MÜZƏFFƏR QULUZADƏ