Çempionatın 13-cü turunun mərkəzi qarşılaşması Tovuzda oldu. “Turan Tovuz” “Neftçi”ni qəbul etdi.

Təəssüflər olsun ki, futbol adına ürəkaçan heç nə olmadı. İstər meydançanın vəziyyəti, istərsə də, tribunalar. Qazon aydın məsələdi. Düzəlməli olsa da, hələ də yaxşı vəziyyətdə deyil. Tribunalar isə…

Mövsümün ikinci Tovuzda keçirilən qarşılaşmasıdı. “Turan Tovuz” ilk matçda Şamaxını qəbul etdi. Tribunalar tam olaraq dolmasa da, 5800 tamaşaçı oyunu canlı olaraq stadiondan izlədi. Bu tur isə rəqəmlərin sayı 1300 vahid az, 4500 olaraq göründü.

Niyə? Axı rəqib Azərbaycan futbolunun flaqmanı “Neftçi”di. Özü də qeyri-sabit vəziyyətdə olan, baş məşqçisiz, “Turan”ın məğlub edə biləcəyi “Neftçi”. Axı bu oyunda bütün biletlər satılmalı idi, nəinki azalmalı.

Bəlkə də qələbələr seriyasının qırılması, baxımlı oyuna həsrət qalmaqları yerli publikanı stadiondan soyudub. Amma “hər şeyə rəğmən “Turan” deyən azarkeşlər tribunada olmalı idi…

Olmadı. Nə isə, 4800 az rəqəm deyil. Azərbaycan futbolu üçün az olmaya bilər, “Turan Tovuz” adına isə azdı!

MÜZƏFFƏR QULUZADƏ