Türkiyə yığmasının və ''Əl-Əhli''nin üzvü Merih Dəmiral gələcəyi ilə bağlı yekun qərarını verib.

"Football-plus.az" xəbər verir ki, təcrübəli mərkəz müdafiəçisinin gələn yay klubu ilə müqaviləsi başa çatır.

Yanvardan etibarən istədiyi klubla danışıqlar aparmaq hüququ olacaq Merihə ''Fənərbaxça'' ciddi maraq göstərirdi. Amma 27 yaşlı futbolçu karyerasını elə Səudiyyə Ərəbistanında davam etdirməyə qərar verib. Bu xəbəri ''Fanatik'' nəşri paylaşıb.

Bir müddət öncə ''Əl-Əhli''nin Dəmirala indikindən də sərfəli bir yeni təklif irəli sürdüyü məlum olmuşdu. Futbolçunun indiki illik qazancı 12 milyon avrodu. ''Fənər'' isə ona maksimum 7,5 milyon avro təklif edirdi. Ona görə də Dəmiralın Səudiyyə Ərəbistanı nəhəngində qalmağa üstünlük verməsi təəccüblü deyil. Tərəflərin artıq anlaşma əldə etdiyi bildirilir. Ən qısa müddətdə rəsmi açıqlamanın veriləcəyi və yeni müqavilənin detallarının bəlli olacağı gözlənilir.

Qeyd edək ki, 2023-cü ildən ''Əl-Əhli''nin şərəfini qoruyan Merih indiyə qədər bu klubda 81 rəsmi oyuna çıxaraq aktivinə 3 qol, 4 məhsuldar ötürmə yazıb. ''Əl-Əhli'' Asiya Çempionlar Liqasının son qalibidi. Merih ötən mövsüm bu turniri qazanan ilk türkiyəli futbolçu kimi tarixə düşmüşdü.