Əcnəbi jurnalistlərin Misli premyer-liqasına marağı artır!
Daha əvvəl Misli premyer-liqasının 11-ci turunun “Qarabağ” – “Neftçi” matçında (2:0) Şimali Kiprdən olan jurnalistlərlə rastlaşdığımızı yazmışdıq.
“Qarabağ”ın, demək olar ki, bütün avrokubok matçlarında başqa ölkələri təmsil edən media nümayəndələri iş başında olur. “Köhlən atlar” xüsusən ÇL-in liqa mərhələsi çərçivəsində keçirdiyi görüşlərdə qardaş Türkiyədən olan həmkarlarımızdan böyük dəstək görür.
İş ondadı ki, oxşar mənzərəyə “Qarabağ”ın “Sumqayıt”la oyununda da şahidlik etdik. “Mehdi Hüseynzadə”nin media sektorunda bizlə yanaşı, Rusiya və Yaponiyadan olan media nümayəndələri də əyləşmişdi. Onlar matçı maraqla izləyir, hadisələrin axarını çalışdıqları media qurumlarında işıqlandırmağa çalışırdılar.
Heç şübhəsiz, ölkə çempionatına marağın belə artmasının başlıca səbəbi “Qarabağ”ın bu mövsüm Çempionlar Liqasında qazandığı fantastik nəticələrdi.
Bəs, əcnəbi media nümayəndələrinin premyer-liqa matçlarında iştirakı hansı qaydalarla tənzimlənir? Onların fəaliyyətinin şəffaflığına nəzarət etmək məqsədilə hansısa mexanizmdən istifadə olunurmu?
Bu suallarla Peşəkar Futbol Liqasının Media və Marketinq Departamentinin rəhbəri Sənan Abdullayevə müraciət etdik:
“Əlbəttə, çempionatımıza marağın artması “Qarabağ”ın Çempionlar Liqasındakı uğurlu çıxışıyla bağlıdı. Əsasən Ağdam təmsilçisinin avrokubok oyunlarında iştirak edən media nümayəndələri çempionat matçlarında da stadionda olmaq istədiyini bildirir. Təbii ki, belə istəklərə dərhal müsbət cavab vermirik. Əvvəlcə klub tərəfindən oyunda əcnəbi media nümayəndələrinin də olacağı haqda PFL-ə məlumat verilir. Biz həmin jurnalistlərin fəaliyyətini, hansı media qurumlarında çalışdıqlarını araşdırandan sonra qarşı tərəfə müvafiq cavab veririk. İndiyə qədər Misir və Tunisdə çalışan jurnalistlər də çempionat oyunlarında iştirak etmək istədiklərini bildiriblər. Əlbəttə, həmin şəxslər və ya çalışdıqları media qurumları güvəniləcək səviyyədə deyilsə, razılıq vermirik. FİFA və Beynəlxalq İdman Jurnalistləri Assossiasiyasından da bu yöndə müraciətlər almışıq. Onu deyim ki, belə icazələr uzunmüddətli yox, bir matç üçün olur. Daha sonra həmin jurnalistlərlə bağlı matçın AFFA nümayəndəsinə xəbər veririk. Onlar PFL əməkdaşlarının nəzarəti altında fəaliyyət göstərir”.
Sənan bəy əcnəbi media nümayəndələriylə bağlı daha bir məqamı bölüşdü: “Qarabağ” – “Neftçi” matçına gələn, Şimali Kiprdən olan jurnalistlər yalnız oyunla bağlı işlər görəcəkdi. Ancaq matçın “Zəfər turu” çərçivəsində keçirilməsi onlarda xüsusi maraq doğurdu. Belədə hər biri stadiona gələn şəhid övladlarından müsahibə aldı, süjet çəkdi, reportaj hazırladı. Halbuki ilkin məqsəd həm də “Qarabağ”ın baş məşqçisi Qurban Qurbanovdan müsahibə almaq idi. Onu da deyim ki, “Sumqayıt” – “Qarabağ” oyununda Türkiyənin TRT telekanalının əməkdaşları da var idi. Bəli, belə hallar əsasən “Qarabağ”la bağlı olur. Lakin “Sabah”la bağlı hadisəni də xatırlayıram. Belə ki, Qazaxıstandan olan jurnalistlər mövsümün əvvəlində qapıçı Stas Pokatilovdan müsahibə almaq, oyunlarının videounu çəkmək məqsədilə ölkəmizə gəlmişdi. Ümumiyyətlə, belə hallar bizim nəzarətimizdə olur”.
KƏNAN BAHADIR
Digər xəbərlər
