Bu Marko Yankoviçə nə olub, görəsən? Ya yaş özünü göstərir, ya Monteneqro yığmasının dünya çempionatından kənarda qalmasından acıqlıdı, ya da sadəcə, oyunun təzyiqi altından çıxa bilmədi. Hər nəsə, onun “Napoli”yə qarşı oyunu tam bir fiasko idi. Söhbət heç də təkcə ənənəvi ara, “açar” ötürmələrinin sayının azlığından getmir – üç, ya da dörd olardı.

Nədənsə Marko özünü oyunboyu narahat hiss etdi. 54-cü dəqiqəni – penaltiyə səbəb olduğu epizodu bir daha xatırlayaq. Di Lorentsoya mövqe mübarizəsində uduzan monteneqrolu yarımmüdafiəçi çıxış qolunu qaydanı pozmaqda gördü. Hələ utanmadan əli ilə üzünü tutdu. Təbii ki, Di Lorentso ona heç nə etməmişdi, məhlə futbolundan bəri belə bicliklərdən biz də xəbərdarıq, hakimin sənə yazığı gəlsin, penalti verməsin deyə, üzünü tutub yıxılırsan.

Futbolda saç tökmüş, dünya çempionatının finalını idarə etmiş Şimon Marçinyak Markonun “tilovuna düşmədi”, israrla penaltinin vurulmasını istədi. Və Höylunn penaltini vurmağa hazırlaşdığı məqamda Marko komanda yoldaşı Pedro Bikalyo ilə meydandaca münasibətləri aydınlaşdırmağa başladı. Yankoviç penaltinin günahını Bikalyonun üzərinə atır, o isə müqavimət göstərirdi. Yaxşı ki, Bəhlul və başqaları araya girdi, Maradonanın ruhu onun adını daşıyan stadionda əlbəyaxa davanı görmədi. Və yaxşı ki, Koxalski o penaltini dəf etdi, yoxsa “Qarabağ”ın iki legioneri bir daha haqq-hesab çəkəcəkdilər.

Elə 2-ci qolu da Yankoviçin “şah əsəri” saymaq olar. Və söhbət yenə də onun avtoqola səbəbkar olmasından getmir. İmkanınız varsa, oyunun icmalına yenidən baxın. Neres sağ cinahdan cərimə meydançasına daxil oldu, Yankoviç axıra qədər “işləmədi”, onun topu qapı önünə göndərməsinə imkan verdi, ardından Maktominey “qayçı” zərbəsi vurdu, Markoya dəyən top tora düşdü və bununla da oyunun taleyi həll olundu. Halbuki Yankoviç topa toxunmasaydı, Koxalski asanlıqla onu tutacaqdı.

Kəsəsi, Marko bu oyunda özünü də “yandırdı”, “Qarabağ”ı da. Amma onun günahını yumaq, azarkeşlər önündə bəraət qazanmaq üçün vaxtı və imkanı var. Dekabrın 10-da keçiriləcək “Ayaks” ilə oyunu nəzərdə tuturam.

Marko, özünə dön. Sən özünə dönəndə böyük olursan!

ORXAN