Türkiyəli hakimin idarə etdiyi oyunda yenə aləm bir-birinə dəydi!
Məlum olduğu kimi Çempionlar Liqasının pley-offunda ''Brügge'' ''Atalanta''nı öz meydanında 2:1 məğlub edərək cavab oyunu ərəfəsində bir topluq üstünlük yaxaladı.
''Football-plus.az'' xəbər verir ki, bu qarşılaşmanı türkiyəli Xəlil Umut Meler idarə etdi. Türkiyəli hakimlər onsuz da Türkiyə çempionatında aləmi bir-birinə qatırlar.
Görünür, onlar tək bununla kifayətlənmək istəmirlər. Meler Belçikadakı oyundan sonra ciddi tənqid hədəfinə çevrildi.
Əslində bu hakim son anlara qədər oyunu pis idarə etmirdi. Amma onun əsas vaxtın 1-ci dəqiqəsində meydan sahiblərinin lehinə təyin etdiyi penalti çox böyük söz-söhbətlərə səbəb oldu. ''Atalanta''nın müdafiəçisi İsak Hien əli ilə meydan sahiblərinin üzvü Qustaf Nilssonun üzünə azacıq toxundu. Nilssonun özünü yerə atması isə Melerin ''nöqtə''ni göstərməsi ilə nəticələndi. VAR da epizoda qarışmayaraq qərarı qüvvədə saxladı. ''Zərərçəkmiş'' fürsəti əldən vermədi və Belçika çempionu bu şübhəli qolla qalib gəldi.
''Atalanta''nın baş məşqçisi Canpyero Qasperini o qədər əsəbləşdi ki, penaltidən vurulan qolun ardından gödəkçəsini yerə atdı və final fitini gözləmədən içəri yollandı. Qasperini oyunsonrası mətbuat konfransında təbii ki, ilk növbədə penalti ilə bağlı etirazını dilə gətirdi:
''Futbol artıq futbol olmaqdan çıxıb və başqa bir yerə doğru irəliləyir. Futbolçular az qala hər təmasdan sonra qışqır-bağır salaraq özlərini yerə atırlar. Bu, futbol deyil. Mən artıq bu oyunun qaydalarını anlaya bilmirəm. Hər halda bundan sonra oyunçularımdan rəqibə toxunmamaları üçün meydanda pinqvin kimi qaçmalarını tələb edəcəm. Futbolu kimlərin idarə etdiyini və bu oyunun hansı tərəfə yönəldiyini anlamaq olmur. Oyunçuların özlərini yerə atması futbol sayılmır''.
''Atalanta''nın ulduzu Şarls De Ketelare də tənqidi fikir səsləndirib:
''Hakim bizə qarşı haqsız mövqe tutdu. Epizodu 100 nəfərə göstərsən, onlardan heç biri penalti olduğunu deməz''.
Təbii ki, İtaliya mətbuatı da Xəlil Umut Meleri yıxıb-sürüdü. ''Qazetto dello Sport'' nəşrində ''hakim dəhşəti'' başlıqlı yazıda Melerin yaxın keçmişdə ''Ankaragücü'' prezidenti tərəfindən döyülməsi, eləcə də Səudiyyə Ərəbistanı çempionatında idarə etdiyi qarşılaşmada da kobud səhvlərə yol verilməsi xatırladıldı.
Həqiqətən də 38 yaşlı bu ədalət təmsilçisi noyabrın 30-da dəvət aldığı ''Əl-Şabab'' - ''Əl-Hilal'' oyununu o qədər bərbad idarə etmişdi ki, Səudiyyə Ərəbistanı Futbol Krallığı bir daha ona dəvət göndərməyəcəyini açıqlamışdı. Elə sabiq tanınmış hakimlər də Melerin təyin etdiyi penaltinin yanlış olduğunu bildiriblər.
2021-ci ildə ÇL-in finalını idarə etmiş ispaniyalı Mateo Laos bunları deyib:
''Müdafiəçinin əli rəqibin üzünə təmas etsə də, onun niyyəti topla oynamaq idi. Ümumiyyətlə, bu cür kiçik təmasların penalti ilə nəticələnməsi futbolun gələcəyi üçün çox təhlükəli bir haldı. Futbolu idarə edənlər bu məqamın üzərində düşünməlidi''. Sabiq italiyalı hakim Nikola Ritsolinin fikrincə isə VAR mütləq epizoda müdaxilə etməli idi: ''Bu epizod bir daha göstərir ki, futbolda VAR-ın nəyə müdaxilə edib-etməməli olması mövzusu hələ də tam dəqiqləşməyib. VAR mütləq hakimi epizodu izləməyə dəvət etməli idi. Bəli, üzə azacıq toxunuş oldu. Amma oyunçu özünü nümayişkaranə şəkildə yerə atdı. VAR bu cür futbolun ruhuna zidd olan epizodlara mütləq müdaxilə etməlidi. Bizim dönəmimizdə, yəni VAR-ın olmadığı vaxtlarda belə, buna penalti verilmirdi''.
ƏLİ
Digər xəbərlər
