“Qarabağ”ın Çempionlar Liqasının liqa mərhələsinin 5-ci turu çərçivəsində “Napoli”yə qarşı keçirdiyi matçla bağlı qəribə iddia ortaya atılıb.

Belə ki, sosial şəbəkələrdə fəaliyyət göstərən bəzi xəbər səhifələri Ağdam təmsilçisinin büdcəyə qənaət etmək məqsədilə Napoliyə fotoqraf aparmadığını, həmin fotoqrafın isə hesabına həmin turnirin “Qalatasaray” – “Yunion” (Belçika) matçına yollandığını bildiriblər.

Məsələnin vacibliyini nəzərə alaraq apardığımız araşdırma zamanı məlum oldu ki, bu bilgilər həqiqəti əks etdirmir. Daha dəqiqi, klubun mətbuat xidmətindən “Football-plus.az”a verilən məlumata görə, “köhlən atlar” Neapola səfər oyunlarını işıqlandırmağa mükəlləf olan fotoqrafla yollanıb. İstanbula gedən fotoqrafın işi isə yerli çempionatda keçirilən matçlarla bağlıdı. Ən əsası, həmin şəxs İstanbuldakı görüşə getməyi özü istəyib.

Hər halda, “Qarabağ”ın sosial şəbəkə hesablarında Neapolda keçirilən oyunda çəkilən şəkillər təqdim olunub.

KƏNAN BAHADIR