AFFA İcraiyyə Komitəsinin sonuncu iclasında bir sıra ciddi qərarlar verildi.

Bu barədə ətraflı məlumatı diqqətinizə çatdırmışıq. Sözümüzün canı başqa məsələ, daha doğrusu, millinin baş məşqçisi Ayxan Abbasov ilə bağlıdı. Ona görə ki, ictimaiyyət bu iclas sayəsində mütəxəssislə AFFA arasında imzalanan müqavilənin detalları haqda məlumat əldə edəcəyini düşünürdü. Lakin yenə nə əvvəlcədən iclasın tarixi, gündəliyi açıqlandı, nə də məhz qeyd etdiyimiz məsələ ilə bağlı məqamlara aydınlıq gətirildi. Təbii ki, burda əsas məqam Ayxan Abbasovla razılaşmanın müddəti və çalışdırıcının qarşısına qoyulan məqsədlərdi.

Bəli, AFFA-nın saytında verilən məlumatda Ayxan Abbasovla bağlı “A milli komandanın dünya çempionatının seçmə mərhələsi çərçivəsində keçirdiyi son oyunlarla bağlı baş məşqçi Ayxan Abbasovun hesabatı dinlənilib. Milli komandanın çıxışı ətraflı müzakirə olunub, gələcək oyunlarla bağlı fikir mübadiləsi aparılıb” ifadələri işlədilib. Burdan aydın olur ki, AFFA “FİFA Series” və Millətlər Liqası turnirlərində iştirakı zamanı yığmanı Ayxan Abbasovun çalışdırmasında maraqlıdı. Təbii ki, əks halda İcraiyyə Komitəsinin iclasında onun ünvanına tərif yağdırılmaz, komandanın sabiq baş məşqçi Fernando Santuşun dövründən fərqli daha əzmkar, istəkli çıxışla yadda qaldığı diqqətinə çatdırılmazdı. Ancaq bu o demək deyil ki, belədə müqavilənin şərtləri və müddəti ictimaiyyətdən gizlədilməli, AFFA rəsmiləri media nümayəndələrinin gözündən iraq olmalıdı!

Əlbəttə, biz bu məqamlara aydınlıq gətirmək məqsədilə AFFA-nın Mətbuat və İctimaiyyətlə Əlaqələr Departamentinin rəhbəri Murad Axundovla əlaqə saxladıq. Lakin ondan “dişə vurulası” cavab ala bilmədik.

KƏNAN BAHADIR