Görünür, AFFA-nın millimizin yeni baş məşqçisi Ayxan Abbasovla bağladığı müqavilənini müddətini öyrənmək üçün bir qədər də gözləməli olacağıq. Ona görə ki, futbolumuzun başbilənləri oktybarda keçirilməsi planlaşdırılan İcraiyyə Komitəsinin iclasını təxirə salıb.

“Football-plus.az”ın əldə etdiyi məlumata görə, iclas gələn ay, yəni noyabrda, daha dəqiqi, yığmamızın DÇ-2026-nın seçmə mərhələsi çərçivəsində evdə 13-də İslandiyaya, 16-da Fransaya qarşı keçirəcəyi oyunlardan sonra baş tutacaq.

İddia etmək mümkündü ki, söz sahibləri millinin bu oyunlarda xal qazanıb-qazanmayacağına əsasən müəyyən addımlar atacaq. İş ondadı ki, hazırda yığmanın bu komandalarla heç-heçə etməsi belə inandırıcı görünmür. Öz aramızdı, Fransa 10 xalla lider, İslandiya isə 4 xalla 3-cü sıradadı. Əlbəttə, Didye Deşamın komandasının Azərbaycanla matçda xal itirmək ehtimalı sıfra bərabərdi. Arnar Qunnlauqsonun komandası isə sonuncu matçda məhz Fransayla heç-heçə edib. Hələ onu demirik ki, öz meydanlarında bizimkilərin qapısından 5 cavabsız top keçiriblər.

Hər halda, bir qədər gözləmək lazımdı. Çünki AFFA-nın Millətlər Liqasında Ayxan Abbasova güvənib-güvənməyəcəyini zaman göstərəcək.

KƏNAN BAHADIR