“Belə də olmalıydı. Əcnəbilərin vəzifədə olması hakimliyin inkişafına gətirib çıxara bilməz. Bu yol ancaq məhvə apara bilər. Yaxşı ki, rəhbərlik bunu başa düşdü. Rəhim Həsənovu təyinatı münasibətilə təbrik edirəm. Bilindiyi kimi, o futbolçu idi. Bizim dövrümüzdə hakimliyə başladı. Ədəbi, tərbiyəsi, mədəniyyəti ilə seçilən hakimlərdəndi. Hər halda, rəhbərliklə müəyyən müzakirələr aparıb. Ona tapşırıqlar verilib. Müasir futbolda hakimlik problem olaraq qalır. Hansısa ölkə deyə bilməz ki, bizdə hakimliklə bağlı hər şey qaydasındadı. O başqa məsələ ki, Rəhim Həsənov üçün çətin olacaq. Gənc kadrdı. Ən qısa müddətdə bölgələri gəzmək, perspektivli hakimlər tapmaq lazımdı. Hazırda premyer-liqada hakimlər arasında rəqabət yoxdu. Ona bu cür çətin, ağır peşədə uğur arzulayıram. Bu təyinat məni sözün əsl mənasında çox sevindirdi. Rəhim Həsənov müasir futbola bələddi. Hadisələrin axarını təhlil etdiyinə əminəm. Bu barədə yalnız müsbət yöndə danışmaq olar. Ona ilk növbədə dəstək vermək lazımdı. İndiyə qədər əcnəbi mütəxəssislər gəldi, getdi. Ancaq hansısa inkişaf görmədik. Rəhim Həsənova vaxt vermək lazımdı. O, çalışqandı və bu işin öhdəsindən gəlməyə qadirdi”.