Türkiyə Futbol Federasiyasının nəzdində fəaliyyət göstərən Apellyasiya Komitəsi ''Fənərbaxça'' və ''Qalatasaray''ın etirazını dəyərləndirib.

''Football-plus.az'' xəbər verir ki, Nizam-İntizam Komitəsi derbi sonrası açıqlamalarına görə Joze Mourinyoya 4, Okan Buruka 1 oyunluq cəza vermişdi. Amma hər iki klub bu qərarla razılaşmayaraq apellyasiya vermişdi. Komitə Mourinyonun cəzasını 4 oyundan 2 oyuna endirib. Amma Burukun 1 oyunluq cəzası qüvvədə saxlanılıb.

Portuqaliyalı mütəxəssis artıq kubokda cəzasının 1 oyununu çəkib. ''Qaziantep''lə son qarşılaşmada o, komandasının başında yer almamışdı. Başqa sözlə desək, Mourinyonun da Buruk kimi 1 oyunluq cəzası qalıb. Mourinyo sabah evdə ''Antalyaspor''a, Buruk isə sabah səfərdə ''Kasımpaşa''ya qarşı oyunda ehtiyat zonada yer almayacaq.

Bu arada Joze Mourinyonun ''Qalatasaray''ı məhkəməyə verdiyi və mənəvi təzminat tələb etdiyi məlum olub. ''Fənərbaxça'' bununla bağlı rəsmi bəyanat yayıb. Qeyd edək ki, 62 yaşlı mütəxəssis derbinin ardından ''Qalatasaray''ın ehtiyat zonasında əyləşənləri hakimə etirazlarına görə meymuna bənzətmişdi. Bu üzdən ''Qalatasaray'' portuqaliyalıdan həm federasiyaya, həm də FİFA və UEFA-ya şikayət etmişdi. Mourinyo isə bunu şəxsiyyətinə və şəxsi hüquqlarına edilən hücum kimi qiymətləndirib. Bu üzdən o, ''Cim-Bom''dan 1 milyon 907 min lirə mənəvi təzminat tələb edir.

Məbləğin ''Fənərbaxça''nın quruluş ili olan 1907 ilə üst-üstə düşməsi diqqət çəkir.

ƏLİ