“Aberdin”lə oynadığımız həftənin sonunda başımıza bombalar yağdı. LNZ ilə matçdan bir gün öncə bombalardan qorunmaq üçün sığınacağa endik. Qəribə səslənə bilər, amma biz qorxmurduq. Sadəcə, yaxınlarımıza və evimizdəkilərə görə narahat idik. Həmin gecə, ümumiyyətlə, gözümüzü yummadıq. Biz heç vaxt növbəti oyunu hansı şərtlər altında keçirəcəyimizi bilmirik. Heç vaxt bəhanələrin arxasına sığınan adam olmamışam. Ancaq bəzən gözləmədiyin durumlarla qarşılaşırsan. Lvovda LNZ-yə məğlub olduq. Halbuki bizim üçün vacib oyun idi. Bizə əsas ilham qaynağı, bilirsiz, kim oldu? Roman adlı bir uşaq. Evi bombalanan, valideynlərini itirən, 35 dəfə əməliyyat olunan bu uşaq paltardəyişmə otağımıza gələrək “Cənab, üzülməyin. Həyatda həm yaxşı, həm də pis günlər olur. Sadəcə, irəliləmək lazımdı” dedi. Bu qədər çətinliklərdən keçən 8 yaşlı uşaq bizə həm təsəlli, həm də həyat dərsi verdi! Bəzən uğur qazanmaq üçün öyrəşdiyin rahatlıqdan, rahatlıq zonasından çıxmalısan. Düzdü, belə şeylər xüsusilə gənc oyunçular üçün çətinlik yaradır. Ancaq eyni zamanda inkişaf etmək, öyrənmək və rəqabət aparmaq üçün gözəl fürsətdi. Burda bir çox yeni şeylər öyrənəcəyimə inanıram. İşimizə hörmətlə yanaşmalı və ən azı bizi təqib edənlərin xətrinə meydanda gücümüzün 100 faizini qoymalıyıq. Digər tərəfdən, futbolun, sadəcə, bir əyləncə olduğunu unutmamalıyıq. Futbol həyat qədər real deyil. Aradakı fərqi anlamalıyıq. Mənə bu həyat dərsini həmin uşaq verdi. Normal bir klubda səhayət bitəndən bir neçə saat sonra evə dönmək mümkün olur. Amma burda belə deyil. Bəzən bir gündən artıq gözləməli olursan və ya 48 saat keçir, yenidən məşqə başlayırsan. “Şaxtyor” Avropada olduğu və demək olar, hər matçı səfərdə keçirdiyi üçün bu, asan deyil. Mövsümün əvvəlində bəzi əsas oyunçularımızı itirdik. Amma əvəzində heyətimizdə gənc və inkişafa meyilli olan bir çox futbolçu var. Klubun strategiyası məhz belədi. Mən də buna qatılıram və hörmətlə yanaşıram. Tanınmış ulduzlar almaq əvəzinə böyük gələcək vəd edən isimlərlə yola davam etmək istəyirik. Yaşları 18-19 civarında olan İsak, Kauan Elias, Lukas Ferreyra, Lukas Meyreleş kimi futbolçularımız var. Gənc və təcrübəsiz olduqları üçün bəzən istənilən oyunu sərgiləmirlər. Onların səhv etmək hüququnu əllərindən almamışıq. Amma digər tərəfdən, bu futbolçularla qalib gələndə çox böyük sevinc yaşayırıq. Çempionluq? Bunu ilk növbədə Roman üçün ürəkdən istəyirəm. Çempionluq mənim üçün arzularımın reallaşması demək olardı”.