"Qarabağ" artıq Çempionlar Liqasının pley-off mərhələsindədi. Ağdam təmsilçisi buna 3-cü təsnifat mərhələsinin cavab oyunu çərçivəsində "Şkendiya"nı darmadağın etməklə (5:1) nail oldu. Ancaq qarşılaşma təkcə tribunalardakı möhtəşəm ab-hava, bizimkilərin aşkar üstünlüyü ilə yox, həm də 77-ci dəqiqədə yaşanan əlamətdar hadisəylə yadda qaldı: "Qarabağ" akademiyasının yetirməsi Hikmət Cəbrayılzadə avrokubokların ən mötəbərində debüt etdi!

Məlum olduğu kimi, Hikmət əsas komandaya mayın əvvəlində qoşulub. Premyer-liqadakı debütü isə ötən mövsümə - 35-ci turun "Kəpəz"lə oyununa (3:0) təsadüf edib. Hələ həmin matçdan sonra jurnalistlərə açıqlama verən "köhlən atlar"ın baş məşqçisi Qurban Qurbanov onun haqda müsbət fikirlər səsləndirmiş, inamını ifadə etmişdi. Hikmətin "Qarabağ"ın Avstriyada keçirdiyi yay təlim-məşq toplanışında iştirak etdiyindən də xəbərdarıq.

Xatırlayırsızsa, ağdamlılar bu hazırlıq prosesinə daha üç gənc futbolçunu - Mehdi Mütəllimli, Amin Rzayev və Həbib Qədimovu da cəlb etmişdi. Mehdi və Həbib Çempionlar Liqası üçün iştirak ərizəsində yer tuta bilmədisə, Aminlə Hikmət şans qazandı.
Heç şübhəsiz, U-19-un da üzvü olan Hikmət təcrübəli mütəxəssisin ümidlərini doğruldub. Belədə çalışdırıcısı ilk fürsətdə - cütün taleyinin həll edildiyinə şübhə qalmadığı anda Hikmətə şans verdi, başqa sözlə, həvəsləndirmək yönündə çox ciddi addım atdı, əməyini mükafatlandırdı. İndi növbə Hikmətdədi. Bəli, o, "Qarabağ"ın cari mövsümdəki ən gənc futbolçusu olsa da, zirvənin dadına baxdı. Ancaq bu hələ başlanğıcdı.

Hikmət məhz bunun fərqində olmalı, ən əsası, arxayınlaşmamalıdı. Qurban bəyə mükafatına görə yalnız daha böyük uğurlar qazanmaqla təşəkkür etmək olar.

KƏNAN BAHADIR