İspaniyalı tennisçi Karlos Alkaras “Böyük dəbilqə” turnirlərinin 24 qat qalibi, serb Novak Cokoviçin uğurunu təkrarlayıb.

"Football-plus.az" xəbər verir ki, Alkaras noyabrın 13-də ATP-nin Turində keçirilən Yekun turnirinin qrup mərhələsində italiyalı Lorentso Muzettini məğlub etməklə (6:4, 6:1) mövsümdə 70-ci qələbəsini qazanıb. 22 yaş 188 günlüyündə olan Karlos 2009-cu ildən bəri bunu bacaran ən gənc tennisçidi. Həmin vaxt 22 yaş 164 günlük Cokoviç 70 qələbə həddinə çatmışdı.

Alkaras 70 qələbədən 16-nı ATP reytinqində ilk “10-luq”da qərarlaşan tennisçilər üzərində qazanıb. İspaniyalı “Böyük dəbilqə” turnirlərinin altıqat qalibidi, ümumilikdə fərdi yarışlarda 24 titulu var.

Yeri gəlmişkən, ATP-nin Yekun turniri bazar günü başa çatıb. Alkaras finalda Yannik Sinnerlə qarşılaşıb. İtaliyalı tennisçi bu dueldən qalib ayrılıb. Sinner ötənilki uğurunu təkrarlayaraq rəqibini 7:6, 7:5 hesabı ilə məğlub edib. Bu, Sinnerin mövsümdə 6-cı, karyerasında 24-cü tituludu. O, noyabrın əvvəlində “Paris Masters”, iyulda isə Karlos Alkarası məğlub edərək “Uimbldon” turnirinin qalibi olub. Sinner “Uimbldon”u qazanan ilk italiyalı tennisçidi.