Dünyanın ikinci tennisçisi Karlos Alkaras ABŞ-nin Ohayo ştatında - Sinsinnatidə keçirilən “Masters” turnirinin finalında dünya reytinqinin lideri Yannik Sinnerə qalib gələrək (5:0, rəqibin oyundan imtinası) karyerasında 8-ci “Masters” titulunu əldə edib.

"Football-plus.az" xəbər verir ki, ispaniyalı ulduz bu uğura 22 yaş 3 aylığında nail olub.

Beləliklə, Alkaras tarixə 8 “Masters” titulu qazanan ən gənc ikinci tennisçi kimi düşüb. Bu göstəricidə rekord hələ də onun həmyerlisi Rafael Nadala məxsusdu. Rafa 2007-ci ildə Monte Karloda 20 yaş 10 aylığında 8-ci “Masters”ini qazanmışdı.

Bu, həmçinin Alkarasın “Masters” turnirlərində ardıcıl qalib gəldiyi 17-ci oyun olub. O, sonuncu dəfə 2025-ci il martın 22-də Mayamidə keçirilən yarışın ikinci mərhələsində belçikalı David Qoffenə (7:5, 4:6, 3:6) uduzub.

Alkaras bu il 6-cı, karyerası ərzində isə 22-ci titulu qazanıb. O, bu il daha əvvəl Rotterdamda keçirilən ATP-500 kateqoriyalı sərt örtüklü turnirdə, Monte-Karlo və Romadakı torpaq örtüklü "Masters" turnirlərində, torpaq örtüklü "Böyük Dəbilqə" turniri olan "Rolan Qarros"da və Londonda keçirilən ot örtüklü ATP-500 turnirində qalib gəlib. Alkaras eyni zamanda əsas rəqibi Sinnerlə son yeddi qarşılaşmanın 6-da qələbə qazanıb.

İspaniyalı onların ümumilikdə 14 duelindən 9-da, italiyalı isə 5-də qalib gəlib.