Premyer-liqada mövsümün üçdəbiri arxada qaldı.

Mənə elə gəlir ki, artıq müəyyən ilkin nəticələri dilə gətirmək vaxtıdı. Turnir cədvəlinə baxanda hansı komandaların sona qədər elitada yerini qorumağa çalışacağı açıq-aydın görünür. Qış fasiləsində Mbappe, Dembele səviyyəsində futbolçu transfer etməsələr, hansısa qeyri-adi hadisə baş verməsə, “Qəbələ”, “Karvan-Yevlax” və “Qəbələ”nin qalan 22 turda hansı hədəf uğrunda oynayacağı bəllidi. Əlbəttə, futbol ictimaiyyətini maraqlandıran daha vacib suallar var.

Şəxsən mən ilk 6 pillədə qərarlaşan komandaları avrokuboklara vəsiqə uğrunda mübarizədə daha şanslı görürəm. Nə yazıq ki, “Neftçi” ardıcıl 3-cü dəfə avrokuboklardan kənar qalmaq təhlükəsi ilə yaşayır. Və hadisələrin belə axarına görə suçlanası birinci adam Samir Abasovdu!

Turun ilk iki oyununda “Şamaxı” və “Sumqayıt” qələbə qazandı. Jorj Kaşkilyanın şən, baxımlı futbolu bir yerə qədərdi. Təbii ki, bu liqada portuqaliyalı mütəxəssisi “oxuya bilən” məşqçilər var. Ayxan Abbasov asta-asta, usta-usta 3 xalı alıb cibinə qoydu. “İmişli” indi, sadəcə, daha ciddi qiymətləndirilməyin fəsadlarını yaşayır. “Qəbələ”ni isə yüksək qiymətləndirməyə dəyməz. Bu ölkədə ən yaxşı infrastruktura malik klub turnir cədvəlinin zirzəmisində qərarlaşıb və ümidverici nəsə də yoxdu. Sxadadze “oyun varsa, nəticə də olacaq” deyib durur. Amma “nə vaxt olacaq”, “Qəbələ” rəhbərliyi o vaxta kimi dözəcəkmi” suallarına cavab verən yoxdu.

Elitanın digər debütantı “Karvan-Yevlax” da çətin dönəmdən keçir. Bəlkə də komanda qaçqın həyatı yaşamasaydı, nəticələri daha yaxşı olardı. Reallıq budu ki, yevlaxlılar “Araz-Naxçıvan”la oyunda təcrübəsizliyə qurban getdi.

Turun mərkəzi oyunlarından biri heç-heçə bitdi. “Zirə” – “Turan Tovuz” duelini nəzərdə tuturam. Əslində qələbə hər iki tərəfə eyni dərəcədə lazım idi. Çempion olmaq istəyən komanda – söhbət ilk növbədə tovuzlulardan gedir - belə, yəni 6 xallıq oyunlarda xal itirməmələidi. Amma 61-ci dəqiqədə azlıqda qaldıqlarını nəzərə alsaq, 0:0 qonaqlar üçün pis nəticə deyil. Bu başqa məsələ ki, Roberto Olabedən əvvəl Brahim Konateyə də qırmızı vərəqə göstərilməliydi.

Turdan ən qazanclı çıxan komandalardan biri də “Sabah”dı. “Bayquşlar” aşkar autsayder “Kəpəz”lə oyunda heç bir çətinlik çəkmədi. Öz aramızdı, “Qarabağ” real, “Sabah” isə potensial liderdi. 1-ci turdan təxirə salınan və dekabrın 18-də keçiriləcək oyunda mümkün qələbə zirvədəki komandanı dəyişəcək. Təbii ki, “Qarabağ”la “Sabah” həmin vaxta qədər xal itirməsələr.

PFL-in xüsusi həvəslə hazırlaşdığı, təşkilatçılıq adına ortaya möhtəşəm iş qoyduğu “Zəfər turu”na 100-cü Azərbaycan derbisi ilə son qoyuldu. Vensan Abubakarın gəlişi, son vaxtlar “Neftçi”nin oyun səviyyəsindəki artım ağ-qara rənglərə könül verən azarkeşləri qələbəyə heç vaxt olmadığı qədər inandırmışdı. Dolu tribunalar önündə, doğrudan da, baxımlı oyun izlədik. Amma “Neftçi” yenə möcüzəni bacarmadı, bu komandanın “Qarabağ”la oyunlardakı qələbə həsrəti 5 ilə çatdı.

Əslində bu, “Neftçi” adına böyük hədəflər uğrunda mübarizəyə dönmək baxımından da həlledici şans idi. Daha bir imkan boşa verildi, paytaxt klubunun əbədi-əzəli rəqibi səviyyəsində olmadığı göründü. Deməli, qış fasiləsində dəyişikliklər olmalıdı. Növbəti uğursuzluğu azarkeş heç kimə bağışlamayacaq – nə Abubakara, nə Abasova, nə də rəhbərliyə!

Misli premyer-liqası
1-ci dövrə, 11-ci tur
7 noyabr
Şamaxı – İmişli 1:0
Qəbələ - Sumqayıt 0:2
8 noyabr
Araz-Naxçıvan - Karvan-Yevlax 2:1
Zirə - Turan Tovuz 0:0
9 noyabr
Kəpəz – Sabah 1:3
Qarabağ – Neftçi 2:0

1. Qarabağ 10 7 2 1 17-3 23
2. Turan Tovuz 11 7 1 3 15-8 22
3. Sabah 10 6 3 1 16-6 21
4. Sumqayıt 11 6 2 3 18-11 20
5. Zirə 11 5 5 1 18-12 20
6. Araz-Naxçıvan 11 5 4 2 18-17 19
7. Neftçi 11 3 6 2 14-9 15
8. Şamaxı 11 3 4 4 12-13 13
9. İmişli 11 3 3 5 10-12 12
10. Qəbələ 11 1 2 8 8-16 5
11. Karvan-Yevlax 11 1 2 8 9-24 5
12. Kəpəz 11 1 0 10 8-32 3

Bombardirlər: Ba-Muaka Simakala (Araz-Naxçıvan), Coy-Lens Mikels (Sabah) – 6, Bassala Sambu (Neftçi), Velko Simiç (Sabah), Aleksandr Ramalinqom (Sumqayıt), Toral Bayramov (Qarabağ) – 4.

Növbəti turun oyunları noyabrın 21-23-ü aralığında keçiriləcək: Karvan-Yevlax – Kəpəz, Sumqayıt – Qarabağ, Araz-Naxçıvan – Turan Tovuz, Zirə - Qəbələ, Sabah – Şamaxı, Neftçi – İmişli.

ORXAN