“Fikrimcə, hələ 10 il də rahat oynaya bilərdim. Zatən məni “Beşiktaş”dan çox adam tanıyır. Karyeram başqa cür də alına bilərdi. Amma qismət belə imiş. Öz istəyimlə futboldan uzaqlaşdım. Çünki futbolun verilən sözlərin yerinə yetirilmədiyi bir sektor olduğunu düşünürəm. Artıq bu sahədə olmaq istəmədim. Heç kimi pisləmək istəmirəm. Amma yaşananlar ortadadı. Bəziləri mənə şərhçiliyə keçməyi məsləhət görmüşdü. Amma mən “Adanaspor”da oynayarkən artıq bu işin planlarını qurmağa başlamışdım. Bəzi çətinliklərim var idi. Karyeram ərzində qazandığım pullardan müəyyən məbləğ kənara ataraq toplaya bilmişdim. Bu işdə xərclərimi hesablayandan sonra həm psixoloji baxımdan, həm də ailəmə görə iş sahəmi dəyişmək qərarına gəldim. İndi ayağımı yorğanıma görə uzadıram. İçim rahatdı. Atam 30 illik dönər ustasıdı. Ona güvənərək dükan açdım. O olmasa, bu işə cəsarət edə bilməzdim. Şükürlər olsun ki, hər şey qaydasında gedir. İşləyən, çalışqan adamı hər kəs sevir. Rikardo Kuareşma vaxtilə mənə “başqalarının sənin haqda dediklərinə fikir versən, heç nə bacarmayacaqsan” demişdi. Hər kəs istədiyini düşünə, deyə bilər. Mən təmiz və halal yolu seçdiyimi düşünürəm. Dönər dükanımın sosial şəbəkələrdə yayılmasından sonra mənə maraq artdı. Yəqin ki, bu maraq karyeramla bağlıdı. Bəziləri bu paylaşımları məni ələ salmaq üçün etmişdi. Amma göründüyü kimi, tam əks effekt verdi. Mənim üçün əsas odu ki, dönərimi yeyən insan bura yenidən qayıtsın. Belə olacağı təqdirdə, deməli, mənim məhsulum gözəl alınıb. Bəyənməyən insan da iradlarını çatdıra bilər. Amma inanmıram, elə bir insan olsun. Mənə tez-tez “dönər kəsmək çətindi, yoxsa, cinahdan asma etmək” sualını verirlər. Mənim üçün dönər kəsmək daha çətindi. Futbolu son 25 ildə oynamışam. Dönəri isə üç həftədi kəsməyə başlamışam. Mən hər işə hədəflə başlayıram. Gözəl bir plan və proqramla yeni sahəmi bütün Türkiyədə populyarlaşdırmaq, 20-25 filial açmaq istəyirəm. Nə qədər vaxtımı alacağını bilmirəm. Amma əzmlə çalışıram”.