Daha öncə Türkiyədə bir neçə klubda forma geymiş Jozef de Souza ilə bağlı sürpriz xəbər yayılıb.

Təcrübəli braziliyalı yarımmüdafiəçi yenidən Türkiyəyə qayıtmaq istəyir. Bu məlumatı Türkiyənin ''Sabah'' nəşri yayıb.

Jozef hazırda şərəfini qoruduğu ''Vasku da Qama''da xoşbəxt deyil. Baş məşqçi çempionat oyunlarında ona güvənmir. Jozef bu mövsüm bu klubda cəmi 3 rəsmi oyunda forma geyib. O, menecerinə Avropada yeni klub tapmağı tapşırıb. ''Sambaçı'' xüsusilə Türkiyəyə qayıtmaq arzusundadı və istənilən təklifi dəyərləndirməyə hazırdı. Baxmayaraq ki, onun artıq 36 yaşı var. Jozef məhz elə ''Vasku da Qama''nın yetirməsidi və karyerasına da bu klubda start verib.

Türkiyəyə yolu düşənə qədər o, ''Vasku''dan başqa ''Portu'', ''Qremio'', ''San Paulu''da top qovmuşdu. Türkiyədə Jozef 2015-18-ci illərdə ''Fənərbaxça'', 2020/21 və 2022/23 mövsümlərində ''Beşiktaş'', 2023-24-cü illərdə isə ''İstanbul BŞ''nin şərəfini qoruyub. Ötən mövsümün qış fasiləsində isə o, vətəninə qayıdaraq ''Vasku'' ilə anlaşmışdı.

Onun Türkiyədə ən uğurlu dönəmi 2020/21-də olub. Həmin vaxt bu futbolçu ''Beşiktaş''la ölkə çempionluğu da daxil olmaqla 3 titul qazanmışdı.