“Beşiktaş”ın qış transfer dönəminin son günündə “bombaları partlatdığını” xəbər vermişdik.

"Football-plus.az" xəbər verir ki, İstanbul nəhəngi 10 milyon avro qarşılığında “Legiya”dan albaniyalı oyun qurucusu Ernest Muçini transfer edərək onunla 3,5 illik müqavilə imzalamışdı. Bundan başqa, “Braqa”dan Əl-Musrati mövsümün sonuna qədər icarəyə götürülmüşdü. “Qartal” yayda bu futbolçunu daimi əsasda heyətinə qatmalı idi. Amma Əl-Musrati ilə bağlı yeni xəbər var. Belə ki, rəhbərlik yayı gözləməmək qərarına gəlib. Tam adı Əl-Moatasembella Əli Məhəməd Əl-Musrati olan 27 yaşlı liviyalı dayaq yarımmüdafiəçisinin srağagün daimi əsasda transfer edildiyi açıqlandı. Onunla da 3,5 illik müqavilə imzalanıb. Əl-Musrati bazar ertəsi Kayseri səfərində qolsuz bərabərliklə başa çatan görüşdə 66-cı dəqiqədə meydana çıxaraq debüt etdi. Ən əsası “Beşiktaş” bir neçə gün ərzində iki dəfə transfer rekordunu yenilədi. Buna qədər klub tarixinin ən bahalı transferi 2009-cu ildə “Qaziantepspor”dan 8 milyon avroya transfer edilən Rodriqo Tabata idi. Bu futbolçu ilyarım “ağ-qaralar”ın heyətində top qovandan sonra ayrılmışdı. Maraqlıdı ki, hazırda 43 yaşı olan braziliyaəsilli qətərli futbolçu indiyə qədər də karyerasını davam etdirir. Ötən cümə günü 10 milyon avroya alınan Muçi yeni rekordçuya çevrilsə də, bu rekord cəmi 4 gün davam etdi. Belə ki, “Beşiktaş” çərşənbə axşamı Əl-Musratinin 11 milyon avro qarşılığında daimi əsasda transfer edildiyini açıqladı! Peşəkar karyerasına ölkəsinin “Əl-İttihad” klubunda başlayan və 4 mövsüm burda çıxış edən Əl-Musrati 2017-ci ildən bəri Portuqaliyada top qovub. “Gimaraynş” və “Riu Ave” macərasının ardından Əl-Musrati 2020-dən bu yana “Braqa”nın uğurları üçün tər tökürdü. Liviya yığmasında indiyə qədər 42 oyuna 2 qol vuran futbolçu klub karyerasında 219 rəsmi qarşılaşmada 17 qol, 11 məhsuldar ötürmə ilə fərqlənib.