2028-ci ildə 4 ölkədə - İngiltərə, Şotlandiya, Uels və İrlandiyada keçiriləcək qitə çempionatının təqvimi təsdiqlənib. Bu məlumatı UEFA-nın saytı yayıb.

"Football-plus.az" xəbər verir ki, turnirdə ümumilikdə 51 oyun keçiriləcək. Matçlar 4 ev sahibi ölkənin 8 şəhərində yerləşən 9 stadionda oynanılacaq. Həmin arenalar “Nəşnl Stedium of Uels” (Kardiff), “Dublin Arena” (Dublin), “Hempden Park” (Qlazqo), “Sent Ceyms Park” (Nyukasl apon tayn), “Mançester Siti Stedium” (Mançester), “Everton Stedium” (Liverpul), “Villa Park” (Birmingem), “Tottenhem Hotspur Stedium” (London) və “Uembli” stadionudu (London). Hər bir idman qurğusunda azı iki fərqli qrupun oyunları keçiriləcək.

Turnirin açılış matçı 2028-ci il iyunun 9-da Uelsin paytaxtı Kardiffdəki “Nəşnl Stedium of Uels”də, yarımfinal və iyulun 9-na təyin olunan final oyunları isə “Uembli”də təşkil ediləcək. AÇ-2028-də 24 komanda 6 qrupda mübarizə aparacaq.

Qeyd edək ki, UEFA təşkilatçı ölkələrdən yalnız ikisinə final turnirinə birbaşa vəsiqə ayırıb. Həmin vəsiqələr isə son iki seçmə mərhələdə daha çox əmsal toplayan komandalara veriləcək.