“Hər birimiz ümid edirdik ki, Ayxan Abbasovun rəhbərliyi altında qələbə qazanarıq. Təəssüf ki, mümkün olmadı. İki fərqli hissə izlədik. İlk yarıda çəkinən milli komanda gördük. Bilmirəm, hansı plan üzrə belə oldu. Millimizi tanıya bilmədik. İkinci hissədə isə yığmamız tam potensialını ortaya qoya bilməsə də, daha aqressiv, yaxşı oynadı. Qol imkanlarımız da oldu. Onu da nəzərə alaq ki, xeyli itkilərimiz var idi. Gənclərimiz debüt etdi. Bu çox müsbət məqamdı, gələcəyə atılan addımdı. Ümid edirik ki, milli komandamız oyundan-oyuna inkişaf edəcək, azarkeşlərimizi sevindirəcək. İlk hissədə rəqib hücuma çıxmağa imkan vermədi. İki qol vurandan sonra İslandiya müdafiədən oynamağa üstünlük verdi. Rüfət Abbasov da, Abbas Hüseynov da hücuma güc qatırdı. İlk hissədə müdafiədə qalmaları da məşqçi qərarı idi. Tək bizim oyunçuları yox, rəqibi də nəzərə almalıyıq. Onlar üç xal üçün gəlmişdilər. Bizi də yaxşı təhlil etmişdilər. Heyif, erkən qol buraxdıq. İkinci qolun da buraxılması planları pozdu. Millimizin timsalında yaxşı oyunu qollar buraxandan sonra gördük. Ən vacibidi odu ki, gənclərimiz, debütantlarımız özünü yaxşı tərəfdən göstərdi”.

“Rəqibin nəticəyə oynayacağı əvvəldən bəlli idi. Çünki növbəti mərhələyə çıxmaq üçün hələ də şanslarını saxlayırdılar. Hər halda, mən Bakıda ən pis halda heç-heçə gözləyirdim, düşünürdüm ki, İslandiyadan xal almaq olar. Çünki Ukraynadan evdə xal ala bilmişdik. Təəssüf ki, oyun istədiyimiz kimi başlamadı. Dərin müdafiəyə oturmuşduq, demək olar ki, hücuma çıxa bilmirdik. Topu özündə saxlayan İslandiya hesabı açdı. Bundan sonra bir neçə təhlükəli hücuma çıxsaq da, fərqlənə bilmədik - keyfiyyət problemi oldu. Bəlkə də bu şanslardan yararlanıb hesabı bərabərləşdirsəydik, başqa nəticə ola bilərdi. Amma əvəzində İslandiya “ev tapşırığı” üzrə ikinci topu qapımıza göndərdi. İkinci hissəyə yaxşı başladıq, şanslarımız da oldu. Rüfətin yaxşı zərbəsi var idi, Anatoli boş qapıya düşə bilmədi. Bunlar keyfiyyət göstəriciləridi. Bizim kimi millinin İslandiyaya qarşı nə qədər epizodu ola bilər ki? İki-üç. Onu da yaratdıq. Düşən şanslardan istifadə edə bilsəydik, yəqin ki, yaxşı nəticə ilə ayrılmaq mümkün olardı. Məşqçinin taktikasına gəlincə, Ayxan Abbasov “Şamaxı”da, “Turan Tovuz”da, əvvəlki komandalarında hansı sistemlə oynayıbsa, o sistemi də tədbiq edir. Beş müdafiəçi, iki dayaq yarımmüdafiəçisi, irəlidə üç nəfər. Ayxan Abbasovun özəl sistemi budu. Kim sisteminə uyğundusa, onu da oynadır. Problem nə baş məşqçidədi, nə də futbolçularda. Problem Azərbaycan futbolu ilə bağlıdı. Olanımız budu. İllər boyunca yaxşı futbolçu yetişdirib xaricə göndərə bilməmişik. Baş məşqçi məsələsi isə... Milli Ayxan Abbasova qədər çiçəklənmirdi, böyük nəticələr qazanmırdı ki, indi də o gəlib korlaya. Ayxan Abbasov Fernando Santuşdan fərqli daha abırlı məğlubiyyətlərlə yadda qalır. Artıq 5-6 qol buraxaraq məğlub olmuruq. Fransa kimi güclü yığmaya cəmi üç qolla məğlub olduq. Nə qədər qəribə səslənsə də, biz bu gün bununla təsəlli tapırıq. Problem ümumi sistemdədi, düzgün aparılmayan işlərdədi. Problemlərdən danışsam, çox uzun ola bilər. Fransa ilə oyunu yola verəndən sonra qarşıdan Millətlər Liqası gəlir. Orda yəqin Ayxan Abbasovun qarşısına şərt qoyulacaq ki, bizi C liqasına qaytarsın. Davamını da federasiya götür-qoy etməlidi. Birmənalı şəkildə görünür ki, milli komandada yerli məşqçilər çalışmalıdı. Əcnəbiləyə milyonların dağıtmağın mənası yoxdu. Bir çox məsələlər var ki, dəyişmək lazımdı. Yəqin ki, AFFA, yeni rəhbərlik bunun üzərində çalışacaq”.