Yığmamız DÇ-2026-nın seçmə mərhələsinin 6-cı turu çərçivəsində sabah Bakıda Fransa ilə üz-üzə gələcək.

“Football-plus.az” xəbər verir ki, oyunöncəsi mətbuat
konfransında Ayxan Abbasov jurnalistlərin suallarını cavablayıb.

- Sabah seçmə mərhələdə sonuncu oyunumuzdu. Çətin qrupda idik. Fransa millisi qrupun lideridi. Səfərdə də ağır oyun olmuşdu. Amma həqiqətən orda futbolçularımızın mübarizəsi 70-ci dəqiqəyə qədər yaxşı idi. Bilirdik ki, sonlarda rəqib üzərimizə daha çox gələcək. Sabah heyətində dəyişikliklər ola bilər. Yeni futbolçular var, özlərini daha çox göstərməyə çalışacaqlar. Bizdə də itkilər
var. Toral Bayramov da dünən zədələndi. Onun yerinə oynayacaq futbolçuya inanırıq. Azarkeş dəstəyi olacaq. İnanıram ki, futbolçularımız ən azından yaxşı mübarizə aparacaq. Bu gün belə rəqiblə mübarizə aparmağın özü də gələcəyimiz üçün yaxşılığa doğru addım sayıla bilər.

- Robert Prosineçkidən sonra gələn məşqçilərin üslubuna baxsaq, hamısı sizin kimi müdafiə taktikası ilə oynayırdılar. Sabah bəlkə "avtobus"u kənara qoyaq, hücum edək, başqa cür oynayaq? Müdafiə futbolundan uzaqlaşmaq mümkündü?
- Müdafiə deyəndə ki, bu gün baxsaq, görərik ki, Fransa ilə oyunda bütün rəqiblər çətinlik çəkir. İslandiya ilə oyunu deyirsizsə, 2 oyun arasında çox fərq var. "Avtobus" müdafiə futbolu deyirik. Bəlkə İslandiya matçı ən çox hücum etdiyimiz oyun idi. Qol epizodları da yaratdıq. Əvvəl 1-2 epziod yaradıb, sevinirdiksə, son matçda 6 qol epizodumuz oldu. Biz də hücum etmək istəyirik, futbolçularımız da. Rəqibdən çox şey asılıdı. Əsas odu ki, sabah mübarizə aparaq. Futbolda ancaq hücum etmək
deyə bir şey yoxdu. Çempionlar Liqasında oynayan komandalar həm hücum edirlər, həm də müdafiə olunurlar. Təəssüf ki, biz ancaq hücumu düşünürük. Reallığımızı qəbul etmirik. Özünəməxsus yanaşmamız olacaq. Rəqibi analiz edərək, hücum etməyə çalışacağıq.

- Şanssızlıqdan heyətdə itkilər var. Mahir və Musa əvvəldən, Elvinlə, Toral sonradan. Sol cinah müdafiəçisi mövqeyində oynaya biləcək yeganə futbolçu Rüfət Abbasovdu. Onun 90 dəqiqə oynamağa fiziki gücü yetəcək, yoxsa hadisələrin axarında taktiki dəyişiklik mümkün olar?
- Sol cinah müdafiəçilərinin zədələnməsi bizi çətin duruma saldı. Rüfət Abbasov İslandiyaya qarşı yaxşı oynadı. İlk matçı idi. Gənclərə şans verməliyik. Onları milliyə görünüş üçün çağırmırıq. Çağırırıqsa, deməli onlara güvənirik. Xəyal Əliyev də pis təsir bağışlamadı. Dəyişiklik ola bilər. Futbolçuların durumuna baxacağıq. İslandiya ilə
matçda çox yükləndilər. Bu gün qərar verəcəyik.

- Şahruddin Məhəmmədəliyevin cəzası bitib. Təcrübəsi digər qapıçılardan çoxdu. Sabah qapıda kimi görəcəyik? Aydını, yoxsa Şahı?
- Bilirik ki, 1-ci qapıçımız Şahruddindi. Aydın Bayramov işinin öhdəsindən gəlməyə çalışdı. Sabah qapıda Şahruddini görəcəyik.

- Toral Bayramovun zədəsi nə dərəcədə ciddidi?
- Əzələsində 1-ci dərəcəli dartılma var.

- Fransa millisinin heyətində çox dəyişiklik olacaq. Əvvəlki komanda olmayacaq, bir az zəif ola bilərlər. Sizin üçün zəfər əldə etmək üçün fürsət ola bilər?
- Rəqibimiz qrupdan çıxıb və yəqin ki, yeni oyunçulara şans verəcək. Amma o futbolçular da Avropanın ən böyük komandalarında oynayırlar. Özlərini göstərməyə çalışacaqlar. Meydanda kim oynasa, fərqi yoxdu. Eyni mübarizəni aparacağıq.

- Azərbaycan millisi üçün sabah əsas motivasiya qaynağı nə olacaq?
- Fransa millisinin xala ehtiyacı var, ya yox, meydana qələbə üçün çıxır. Motivasiyamız odu ki, böyük komandaya qarşı mübarizə aparaq. Böyük oyundu. Bu cür matçlarda mübarizə aparmaq gələcək üçün yaxşıdı.

- Deyirdik ki, milliyə yerli məşqçi gəlsin. İslandiya ilə
oyundan sonra isə deyirlər ki, materialımız yoxdu, legioner limiti götürülüb. Millətlər Liqasına böyük ümidimiz var. Materialı necə dəyişəcəksiz? Ortaya necə yeni material çıxacaracaqsız?
- Material var. Sadəcə formada deyillər. Bu
futbolçularımız tam formada olsalar, Millətlər Liqasında yaxşı mübarizə apara bilərik. Amma ora qədər vaxt var. Futbolçular formada olmalıdı, bunun üçün isə oynamaq lazımdı. Bu gün futbolçu milliyə hazır gəlməlidi. 3-4 günə onları hazır etmək olmur. Seçim imkanımız da olmalıdı. Futbolçular öz klublarında daimi oynamalıdı. Klubda mübarizəni udmalıdılar. 4 hücumçumuzun dördü də formada olsa, rahat olardıq.

- Yenə Fransa ilə oyundan əvvəl "Oser faciəsi"nin qəhrəmanlarından biri, hazırda "Turan Tovuz"da məşqçi kimi çalışan Yunis Hüseynov sizin haqda danışıb. Deyib ki, Ayxan Abbasov özünü gülünc vəziyyətə salır, fikirləri məşqçiyə yaraşmır. "Turan Tovuz" haqda danışmasın filan... Bu açıqlamaya münasibətiniz necədi?
- Gəlin, oyundan qabaq bu mövzulara toxunmayaq. Bütün klublar mənim üçün eynidi. Hər klubun məşqçilərinə hörmətlə yanaşıram, heç bir kluba hörmətsizlik etməmişəm.

MÜZƏFFƏR QULUZADƏ