"Uşaqlar bu cür matçlarda özlərini göstərməlidilər” - Ayxan Abbasov
“Bizi çox önəmli və gərgin oyun gözləyir. Rəqibimiz son illərin ən güclü komandalarından biridi”.
"Football-plus.az" xəbər verir ki, bu sözləri millimizin baş məşqçisi Ayxan Abbasov Fransa ilə sabah keçiriləcək oyundan öncəki mətbuat konfransında bildirib.
“Fransa yığmasında ulduz futbolçular çıxış edir. Amma biz də görüşə ciddi hazırlaşmışıq. Futbolçularımızın böyük komandalara qarşı mübarizəsi önəmlidi. Rəqibin sabah azarkeş dəstəyi də olacaq. Buna baxmayaraq, oyunçularımız bütün güclərini ortaya qoyacaqlar. Belə böyük komandalara qarşı oynamaq özü böyük motivasiyadı. İlk gündən futbolçularımızın məşqə həvəslə yanaşması yaxşı haldı. Gələcəkdə nələrsə qazanmaq üçün uşaqlar bu cür matçlarda özlərini göstərməlidilər”.
Abbasov oyunun nəticəsi barədə proqnoz verməyib:
“Futbolda hər şey mümkündü. Oyunçularımdan istəyim odur ki, nə olur-olsun, meydanda təslim olmasınlar və rəqibdən çəkinməsinlər. Belə böyük oyunlar biz məşqçilər üçün də gözəl şansdı. Məşqçi heyəti olaraq futbolçularımızı oyuna yaxşı hazırlamaq üçün əlimizdən gələni etdik”.
Xatırladaq ki, oktyabrın 10-da “Park de Prens” stadionunda keçiriləcək Fransa - Azərbaycan görüşü Bakı vaxtı ilə saat 22.45-də start götürəcək.
