Herbert Hayner “Bavariya”ya daha bir neçə il rəhbərlik edəcək.

"Football-plus.az" xəbər verir ki, o, Münhen klubunda prezident seçkisində növbəti dəfə qalib gəlib.

Klubun mətbuat xidmətinin yaydığı məlumata görə, 71 yaşlı funksioner Almaniya klubunun Baş Assambleyasının səsverməsində 95,63 faiz səs toplayıb. Vitse-prezident Diter Meyer və vitse-prezidentin müavini Valter Mennekes də öz vəzifələrini qoruyublar.

Xatırladaq ki, Hayner “Bavariya”nın prezidenti vəzifəsini 2019-cu ildən icra edir. Klubun onun dövründə maliyyə vəziyyətini əhəmiyyətli dərəcədə yaxşılaşdırması seçkinin nəticəsinə az təsir etməyib.
Yeri gəlmişkən, “Bavariya” 2024/25 mövsümünün maliyyə hesabatını açıqlayıb. Son mövsüm Almaniya nəhənginin tarixinə rekord gəlirə nail olmasıyla düşüb.

Münhen klubunun mətbuat xidmətinin yaydığı xəbərə görə, “Bavariya” ötən mövsüm 978,3 milyon avro gəlir əldə edib. Bu, əvvəlki mövsmlə müqayisədə 2,8 faiz çoxdu.

Həmçinin qeyd olunan məbləğ klub tarixi üçün yeni rekorddu: “Bavariya” daha əvvəl bu məbləğdə gəlir əldə etməmişdi. Eyni zamanda Almaniyanın son çempionunun əməliyyat mənfəəti 11,3 faiz artaraq 187,8 milyon avroya, vergidən əvvəlki qazancı isə 42,5 milyon avroya çatıb. Vergidən sonra xalis gəlir 27,1 milyon avro təşkil edib.