Türkiyə çempionatından yenə istefa xəbərləri var. Həftənin əvvəllərində “Gənclərbirliyi”ndə Hüseyn Eroğlu dönəmi başa çatdı.

Baxmayaraq ki, debütant bir müddət öncə bu məşqçi ilə hətta səfərdə “Beşiktaş”ı məğlub etməyi bacarmışdı. Ötən tur evdə “Konyaspor”la oyunda qeydə alınan məğlubiyyətin ardından rəhbərliklə Eroğlu qarşılıqlı şəkildə anlaşaraq yolları ayırmağa qərar verdi.

Qeyd edək ki, təcrübəli mütəxəssis paytaxt təmsilçisini ötən mövsümün gedişində - 1-ci liqada 13-cü pillədə qəbul etmiş və elitaya yüksəltməyi bacarmışdı. Hazırda ankaralılar 10 tura topladıqları 8 xalla 15-ci pillədə qərarlaşıblar. “Gənclər”in məşqçisiz günləri çox davam etmədi. Qısa müddətdə razılıq əldə olunan və çərşənbə axşamı Ankaraya dəvət olunan Volkan Dəmirəl ilə ilyarımlıq müqavilə imzalandı. Sonuncu dəfə ötən mövsümün gedişində “Bodrum”u çalışdırmış 44 yaşlı Dəmirəl fevralın əvvəllərindən bəri işsiz idi.

Daha bir istefa xəbəri “Fatih Karagümrük”dən gəldi. İstanbul təmsilçisi Martsel Liçka ilə yollarını ayırdı. Bu ayrılıq da qarşılıqlı razılıqla baş tutdu. 2020-ci ildən bəri Rusiyada işləyən, “Orenburq” ilə Moskva “Dinamo”sunu çalışdıran 48 yaşlı mütəxəssis “Fatih Karagümrük”ün başına bu yay keçmişdi. Onun dönəmində komanda ilk 10 turda cəmi 4 xal toplayaraq sonuncu pillədə qərarlaşmışdı ki, bu da orta hesabla hər oyuna 0,4 xal deməkdi.

“Karagümrük” yalnız 3-cü turda “Antalyaspor”dan (2:1) və son turda “Kayserispor”dan (2:2) xal qoparmağa müvəffəq olmuşdu. Yeni məşqçinin kim olacağı barədə məlumat yoxdu. Son iki istefa ilə birlikdə bu mövsüm superliqada məşqçi ilə yolları ayıran klubların sayı 9-a çatdı! Daha öncə “Beşiktaş”, “Fənərbaxça”, “Qaziantep”, “İstanbul BŞ”, “Eyüpspor”, “Kayserispor” və “Antalyaspor”da məşqçi istefası baş tutmuşdu. Türkiyə futbolu həmişəki kimi məşqçiləri qovmaq baxımından Avropada “yeni zirvələr fəth edir”.

Bir faktı vurğulayaq ki, 2025/26-da təkcə Türkiyədə “böyük beşlik”də baş tutan istefaların ümumi sayından daha çox məşqçi qovulub! Avropanın 5 aparıcı futbol ölkəsində bu mövsüm ümumilikdə 8 istefa reallaşıb.

Konkret desək, premyer-liqada 3, bundesliqada 2, A seriyası, La Liqa və Liqa-1-in hər birində isə 1 istefa baş tutub.