Mahir, Mahir, Mahir... Bir adam bu qədər bəxtsiz olarmı?! Matım-qutum qurudu.

Dünən “Kayzersluatern” 2-ci bundesliqanın 12-ci turunda “Herta”nı qəbul etdi. Berlin klubunun da yüksək hədəflər üçün oynadığını nəzərə alsaq, 6 xallıq qarşılaşma idi. Stadionda 48855 azarkeş var idi. 63-cü dəqiqədə azərbaycanlı azarkeşlərin çoxdan gözlədiyi hadisə baş verdi: Hansliki əvəz edən Mahir Emreli 78 gündən sonra meydana çıxdı. Və az sonra gözəl bir qol imkanını əldən verdi, əlverişli vəziyyətdə olsa da, topu qapının üstündən vurdu.

Mahir o qolu bir neçə gün əvvəl intihar edən dayısı oğlu Sabit Ağayevə həsr edəcəkdi. 78 gündən sonra forma şansı qazanan azərbaycanlı hücumçu 78-ci dəqiqədə meydanı göz yaşı içində tərk etdi. Ciddi zədə alan futbolçu yenə uzun müddətə sıradan çıxdı.

Təsirli, ürəkdağlayan mənzərə idi. Bəlkə də həyatda ilk dəfə mən də ona qoşulub ağlamaq istədim. Belə şanssızlıq, belə bəxtsizlik olarmı?!

20-ci dəqiqədə qapısında qol görən “Kayzerslautern” isə məğlubiyyətdən qaça bilmədi – 0:1.

ORXAN