Çempionlar Liqasında əsas mərhələnin 4-cü turuna yekun vuruldu. Amsterdamda ''Ayaks''ın qonağı olan ''Qalatasaray'' daha bir mühüm qələbə qazanaraq fanatlarını sevindirdi.

"Football-plus.az" xəbər verir ki, ilk yarısı qolsuz başa çatan görüşdə Türkiyə çempionu fasilədən sonra 3 cavabsız qol vuraraq rəqibinə heç bir şans vermədi.

Əvvəlki qələbələrdə olduğu kimi Viktor Osimhen yenə ön plana çıxdı. İkisi penaltidən olmaqla 3 qol vuran və peşəkar karyerasında ilk dəfə avrokubok matçında het-trik edən nigeriyalı ulduz yenə önəmli göstəricilərə nail oldu. ''Sarı-qırmızılar''ın heyətində ÇL-də het-trik edən sonuncu futbolçu 2012-ci ildə ÇFR ilə oyunda Burak Yılmaz olmuşdu. Osimhen hələ ötən tur ardıcıl 7-ci avrokubok matçında fərqlənməklə klub tarixində yeni rekorda imza atmışdı. Bu dəfə isə rekordu bir qədər də yaxşılaşdırdı.

Ümumiyyətlə avrokuboklarda bundan daha yaxşı seriyaya malik olan son futbolçu Robert Levandovski olub. Polşalı qoleador 2020-21-ci illərdə avrokuboklarda ardıcıl 9 qarşılaşmada fərqlənmişdi. Osimhen ardıcıl iki ÇL matçında ən azı iki qol vuran ilk ''Qalatasaray''lı futbolçu oldu. Ən əsası 26 yaşlı forvard ''Cim-Bom''un heyətində avrokuboklarda vurduğu qolların sayını 12-yə yüksəltdi. O, klubun avrokuboklarda ən məhsuldar əcnəbi oyunçuları siyahısında George Haci ilə Mario Jardel kimi isimləri geridə qoydu və zirvədə qərarlaşan Milan Baroş ilə Şabani Nondaya çatdı. Yəni gələn tur da fərqlənəcəyi təqdirdə Osimhen avrokuboklarda klub tarixinin ən məhsuldar əcnəbi futbolçusuna çevriləcək. Onun hazırda 6 qolla ÇL-də bombardirlər siyahısına başçılıq etdiyini də bildirək.

''Qalatasaray'' həm də ''Ayaks''ı səfərdə məğlub edən ilk Türkiyə təmsilçisi kimi tarixə düşdü. Buna qədər Türkiyə klubları bu rəqibə qarşı 8 səfər oyunundan 1 heç-heçə, 7 məğlubiyyətlə ayrılmışdılar. ''Ayaks''ı avrokuboklarda səfərdə darmadağın edən son klub isə 2022-ci ildə ''Liverpul'' (3:0) olmuşdu.

Beləliklə, xalını 9-a yüksəldən ''Qalatasaray'' liqa mərhələsində 4-cü turu 9-cu pillədə tamamladı.