Bildiyimə görə, Bakıda “Çelsi”nin fanklubu da var. Amma “zadəganlar”ı seçən azərbaycanlı azarkeşlər indi məyusluq yaşayır. Yox, “Qarabağ” hələ London nəhəngini məğlub etməyib. Ümid edək ki, sonda elə belə də olar...

“Tottenhem” üzərindəki səfər qələbəsindən sonra “Çelsi”nin (rəhmətlik Səməd Səmədovun iti yadıma düşdü...) düşərgəsində inanılmaz gözəl ab-hava hökm sürür. Komanda bu gün Kobhemdəki bazasında məşq edib. Halbuki bu gün yola çıxa və oyunöncəsi son məşqi Bakıda da edə bilərdilər. Amma Entso Mareska bu variantın əleyhinə olub.

İtaliyalı mütəxəssis belə düşünür ki, futbolçularını Bakı vaxtına uyğunlaşdırmaq lazım deyil. O, vaxt rejimi ilə bağlı belə qəfil dəyişikliyin sıx qrafik üzrə oynayan komandasına mənfi təsir edəcəyindən narahatdı. Bugünkü məşqin ilk 15 dəqiqəsi UEFA-nın tələbinə uyğun olaraq, media nümayəndələrinə açıq olub. Ardından ənənəvi şəkildə məşqi davam etdirən londonlular qısa istirahətdən sonra Bakıya çarter reysi ilə gələcək.

Səfər şərtləri Mareskanı narahat edən bir başqa məqamdı. O, belə hesab edir ki, 5 saatlıq uçuş, Londondan Azərbaycan paytaxtına olan 5 min mil (1 mil = 1609 metr – red.) məsafə istər-istəməz futbolçularını yorğun salacaq. Baş məşqçi vəziyyətdən çıxmaq üçün heyətdə geniş rotasiyaya əl atmağı üstün tutub. Yəni Mareska daha çox “Tottenhem”ə qarşı oynamayan futbolçulara güvənəcək. Amma heyət seçimi necə olur-olsun, müdafiənin mərkəzindəki Çaloba – Fofana tandeminə toxunulmayacaq.

Kəsəsi, “Çelsi” Bakıya qaranlıqda gəlir və qaranlıqda da gedəcək. Təki günün müəyyən zaman kəsiyi mənasında yox, nəticə baxımından da qaranlıqda getsin. Hamı stadiona!

ORXAN