"Qarabağ" qış "transfer pəncərəsi"ndə Juninyonu qaytarsa, təəccüblənəcəksiz? Şəxsən mən yox! Çünki "köhlən atlar" yollarını ayırdığı futbolçularla dəfələrlə yenidən anlaşıb. Elə hazırda komandanın şərəfini qoruyan Şahruddin Məhəmmədəliyev, Musa Qurbanlı və Ramil Şeydayev daha əvvəl başqa yerlərə üz tutsa da, hadisələrin axarı onları Qurban Qurbanovun sərəncamına qaytarıb. Qısası, az gedib, üz gedib, dərə-təpə düz gedənlərin yolu yenidən "Qarabağ"la kəsişəndə sürpriz sayılmır.

Hər halda, bir vaxtlar yuxarıda adı çəkilən futbolçuların da adı növbəti dəfə "köhlən atlar"la hallandı və zaman həmin xəbərləri yayan həmkarlarımızı yalançı çıxarmadı. İndi də bəzi saytlarda Juninyonun dönəcəyi haqda xəbərlər tirajlanır.

Kimdi Juninyo? Söhbət "Qarabağ"da çıxış etdiyi dövrdə premyer-liqada 23 (48 oyun), ölkə kubokunda 5 (6 oyun), avrokuboklarda 14 (27 oyun) qol vuran hücumçudan gedir. O, Braziliyadandı və hazırda ölkəsində "Flamenqo"nun formasını geyir. Karyerasına gəlincə, işləri yolunda getmir. Bu il yanvarın 15-də Rio təmsilçisiylə anlaşan futbolçu indiyə qədər yeni komandasının heyətində 28 matç keçirib və cəmi 3 qolla yadda qalıb. Juninyo bu görüşlərdə 778 dəqiqə meydanda olub ki, hər qarşılaşmada orta hesabla 28 dəqiqə forma geyib. Bu o deməkdi ki, braziliyalı ölkəsində heç də əsas heyət üzvü deyil. Bu üzdən Braziliya mətbuatının vaxtaşırı futbolçunun "Flamenqo"da xoşbəxt olmadığını tirajlamasına haqq qazandırmamaq mümkün deyil.

Bəs, o, "Qarabağ"a lazımdımı? Bəli. "Köhlən atlar"da mütləq onun kimi istəkli, çılğın və qol vurmaq üçün alışıb-yanan hücumçuya ehtiyac var. İş ondadı ki, Juninyo indi "pas atıb". Qurban Qurbanovun onu cilalamaq istəyib-istəməyəcini isə zaman göstərəcək. O bəllidi ki, Ağdam təmsilçisinə bircə hücumçu çatmır.

KƏNAN BAHADIR