8-ci turun “Neftçi” - “Araz-Naxçıvan” oyununda yenə də hakimlik gündəm oldu. Amma əsas məsələ başqadı. VAR-da ciddi problemlər var.

“Neftçi”nin vurduğu 2-ci qolda əvvəlcə ofsayd qərarı verildi. Epizoda müdaxilə edən VAR bir neçə dəqiqə epizodu incələdi, daha sonra isə mərkəz göstərildi. Amma qərar şübhəli qaldı.

Ofsaydın olduğu necə sübut olunmalıdı? Xətt çəkilməklə. Amma nə xətt çəkildi, nə də bir şey oldu. Qolu vuran Emin Mahmudov belə şokdaydı. Xətt niyə çəkilmir? VAR nə işə baxır? Qar yox, boran yox, VAR niyə bu günə düşüb?

Bu məsələ ilə bağlı AFFA-nın Mətbuat və İctimaiyyətlə Əlaqələr departamentinin rəhbəri Murad Axundovla əlaqə saxladıq. Həmkarımız bu barədə AFFA tərəfindən açıqlama veriləcəyini dedi. Bu, ilk belə problem deyil. Ötən tur da “Zirə” - “Neftçi” matçında VAR videogörüntü göstərməmişdi. Nə kəramətdisə, bütün problemlər “Neftçi”nin oyunlarında olur...

MÜZƏFFƏR QULUZADƏ