“Hakimlərimiz epizoda VAR-da bir neçə dəfə baxır, amma yenə qərar verməkdə çətinliklə üzləşirlər” – Zirədəki narazılığa izahat
Misli premyer-liqasında 25-ci turun “Zirə” - “Turan Tovuz” oyununda bir məqam diqqətimizi çəkdi.
Qonaqlar 12-ci dəqiqədə “qartallar”ın qapısına yol taparkən epizod VAR-da 6-7 dəqiqə incələndi. Təbii ki, yetərincə uzun müddətdi. Başqa oyunlarda da VAR-ın dəqiqləşdirməni gecikdirməsi ilə bağlı narazılıqlar olur.
Bu üzdən “Football-plus.az” təcrübəli veteran hakimlərdən Fariz Yusifova bu sualla müraciət etdi: “Zirə” “Turan Tovuz” oyununda VAR-ın qərarı dəqiqləşdirməsinə 6-7 dəqiqə vaxt sərf olundu. Sizcə, Azərbaycanda buna niyə çox vaxt ayrılır? Eyni zamanda bu məqam oyunun dinamikasina, futbolun gözəlliyinə xələl gətirmirmi?”
Fariz bəyin cavabı:
“Şəxsən mən VAR-ın oyuna necə təsir etməsi, oyunun dinamikasını, sürətini azalması haqda müsahibə vermişdim. “Zirə” - “Turan Tovuz” oyununda VAR-ın 6-7 dəqiqə vaxt aparması, əlbəttə, oyunun həm dinamikasina, həm sürətinə, həm də futbolçuların motivasiyasına təsir edib. Epizoda birinci baxışda hakimin beyninə siqnal gedir. Mən fikir verirəm: hakimlərimiz epizoda VAR-da bir neçə dəfə baxır, amma yenə də qərar verməkdə cətinliklə üzləşirlər. Burdan hakimlərə səslənirəm, əsasən də gənc hakimlərə. Qərar verməzdən öncə, epizoda ilk baxışda beyinə hansı siqnal getdisə, onun üzərində dayanmaq daha məqsədəuyğun olar. VAR-da oturanlar məsuliyyətli, yetərincə təcrübə toplamış hakimlərdi, amma hər hansı bir epizodun dərinliyinə, dəqiqliyinə getmək ücün operativ olmaq lazımdı. Epizoda bir, maksimum iki dəfə baxandan sonra qərar verməlisən”.
ELMİN İSKƏNDƏRLİ
