“Real”ın braziliyalı hücumçusu Vinisius Juniorun başından heç vaxt qalmaqal əskik olmur. Əslində onu Mahir Emrelinin braziliyalı variantı saymaq mümkündü. “Futbol+” səhifələrində dəfələrlə Vininin hoqqalarından bəhs etmişik. Bu dəfə isə adı çəkilən futbolçu yayda baş verən qalmaqalın mərkəzindədi. İctimai qaydaları pozduğuna görə onu həbs cəzası və ya cərimə gözləyir. İş ondadı ki, braziliyalı ulduz doğum gününü hədsiz səs-küylü məclis keçirməklə qeyd edib.

“Marca” hüquq-mühafizə orqanlarındakı qaynaqlara istinadla xəbər verir ki, futbolçunun adı vətənindəki məhkəmə işində keçir. O, doğum gününü qeyd etmək üçün Rio-de-Janeyroda məclis qurub və bu zaman adamların rahatlığını pozan hərəkət və davranışlar olub. İşə xüsusi cinayət məhkəməsində baxılır. Həmin məhkəmə ağırlıq dərəcəsi böyük olmayan qanun pozuntularının araşdırılmasıyla məşğuldu. Məhkəməyə futbolçunun qonşuluğunda yaşayan şəxslərdən biri şikayət edib. Xatırladaq ki, Vinisius iyulun 19-21-i aralığında dostlarını başına yığaraq 25 illiyi münasibəti ilə məclis keçirib.

Braziliyanın məşhur nəşrlərindən “O Globo” xəbər verir ki, məclis böyük mərasimlər – toylar, korporativ tədbirlər – üçün nəzərdə tutulan dəbdəbəli malikanədə təşkil olunub. Məclisi yüksək səsli musiqi müşayiət edib, ətrafda yaşayanların rahatlığı pozulub. Şikayətçi iddia edir ki, hətta polis çağırmalı olub. Polis insidenti qeydə alaraq iştirakçılardan səsi azaltmağı tələb edib. Naməlum qonşunun dediyinə görə, Vini və qonaqları polislərin tələbinə əməl etsələr də, onlar gedəndən sonra yenidən səsi yetərincə yüksək səviyyəyə qaldırıblar.

Bəs doğrudanmı dünya ulduzunu həbs cəzası gözləyir? Braziliya qanunvericiliyinə görə, “başqalarını iş fəaliyyətini və sakitliyini pozmağa” görə şəxs 15 gündən 3 aya qədər həbs oluna və ya cərimələnə bilər. Vinisius isə 25 yaşını təntənəli şəkildə qeyd edərkən bütün qaydaları pozub. Tədbir konsert formasında keçirilib (hətta reper Trevis Skott da çıxış edib), atəşfəşanlıq olub, attraksionlar qurulub.

“O Globo” onu da bildirir ki, doğum günü şənliyinə 500-ə yaxın qonaq toplaşıb, onların arasında “Real”ın fransalı yarımmüdafiəçisi Eduardo Kamavinqa, həmçinin bir çox başqa məşhurlar, braziliyalı ulduz müğənni Anitta da olub.

Rio-de-Janeyro ştatının məhkəmə orqanlarından verilən məlumata görə, bu işlə bağlı ilkin dinləmə noyabrın 6-na təyin olunub. Çox güman, Braziliya yığmasının hücumçusu canını cərimə ilə qurtaracaq.

Vinisius “Real”ın şərəfini 2018-ci ilin yayından qoruyur, müqaviləsinin müddəti 2027-ci ilin iyununa qədərdi. O, cari mövsümdə keçirdiyi 16 oyunda 6 qol vurub. Bu payız ulduz futbolçunun həyatında meydandankənar problemlər çoxdu. Əvvəlcə model Virciniya Fonseka ondan ayrılıb, növbəti gün Madrid ətrafındakı mülkündə yanğın baş verib – binanın zirzəmisində yerləşən sauna yanıb. Xoşbəxtlikdən heç kim zərər görməyib. Futbolçu özü həmin vaxt milli komanda ilə birgə Asiya turnesindəydi.