"Qarabağ" "Atketiko"yla oyundan əvvəl ciddi itkiylə üzləşdi! - Bilbao səfərinin detalları
"Qarabağ" oktyabrın 22-də Çempionlar Liqasının liqa mərhələsinin 3-cü turu çərçivəsində "Atletik"in qonağı olacaq.
Ağdam təmsilçisinin bu matça da ciddi hazırlaşdığına şübhə yoxdu. Ona görə ki, ilk iki matçda qələbə qazanan "köhlən atlar"ın Bilbao komandasından da xal almaq iqtidarında olduğuna inam var. Hər halda, əsas mərhələni ilk "24-lük"də bitirmək ehtimalı və şansı varsa, heç şübhəsiz, sınamağa dəyər! Zarafat deyil, söhbət avrokubokların ən mötəbər turnirindən gedir.
Bəs "Qarabağ"ın bu oyunla bağlı səfər planı necədi? Bu barədə klubun mətbuat xidmətinin rəhbəri Anar Hacıyevdən məlumat aldıq:
"Bu gün, saat 18.00-da birbaşa çarter reysiylə Bilbaoya uçacağıq. Oyundan bir gün əvvəl keçiriləcək mətbuat konfransı Bakı vaxtıyla 21.15-də başlayacaq. Burda baş məşqçimiz Qurban Qurbanov və futbolçulardan biri media nümayəndələrinin önünə çıxacaq. Mətbuat üçün ilk 15 dəqiqəsi açıq olan məşq isə 21.45-də başlayacaq. Oyundan dərhal sonra dərhal qayıdacağıq".
"Anar bəy heyətdə zədəli varmı?" sualını belə cavabladı: "Bəli, təəssüf ki, zədəlimiz var. Söhbət Musa Qurbanlıdan gedir. O, dizindən aldığı zədə üzündən komandayla birgə Bilbaoya yollanmayacaq. Müalicəsi davam edir. Xoni Montiel fərdi məşqlərlə məşğuldu. Marko Yankoviç isə komandayla birgə məşq edir".
Klub rəsmisindən komandanı İspaniyada dəstəkləmək istəyən tərəfdarların sayını da soruşduq. O, "Football-plus.az"a açıqlamasında təxminən 400 biletin satıldığını bildirdi. Maraq üçün qeyd edək ki, "Qarabağ"dan asılı olmayan səbəblərə görə sabahdan bilet satışı dayandırılacaq. Odu ki, bilet almağa tələsin! Axı vauçerlərin satışı "iticket.az"da davam edir. Bu oyun üçün “Qarabağ” azarkeşlərinə 600 yer ayrılıb.Xatırladaq ki, “Estadio de San Mames” stadionunda keçiriləcək oyun Bakı vaxtıyla saat 20.45-də başlayacaq.
KƏNAN BAHADIR
Digər xəbərlər
