Hazırda Yunanıstanın 2-ci liqa təmsilçisi ''Xanya''da forma geyən Ayas Aosman Türkiyə klublarını çətin durumda qoymaqda davam edir.

30 yaşlı suriyalı yarımmüdafiəçinin Türkiyəyə ilk dəfə yolu hələ 2019-da düşüb. Həmin vaxt ''Adana Dəmirspor''da oynamış futbolçu sonradan ''Tuzlaspor'', ''Pendikspor'' və ''Gənclərbirliyi''ndə çıxış edib. Aosman 2024-ün yanvarında ''Gənclər'' ilə müqavilə imzalamışdı.

Müqaviləyə əsasən ona 2023/24-ün ikinci dövrəsi üçün 90 min avro maaş, eləcə də ev və maşın üçün əlavə 6 min avro ödənilməli idi. 2024/25 üçün isə ona 200 min avro maaş və 55 min avro mükafat nəzərdə tutulmuşdu. Amma paytaxt təmsilçisi bu öhdəliyini yerinə yetirməyincə futbolçunun səbri tükəndi. O, müqaviləsini birtərəfli qaydada ləğv edərək Türkiyədən ayrıldı və Şimali Makedoniya klubu ''Qostivar''a transfer olundu. Aosman 438 min avrosunun ödənilmədiyini iddia edərək ''Gənclərbirliyi''ndən FİFA-ya şikayət etdi.

Türkiyə klubu futbolçunun zədəli olduğunu və müqavilənin bu üzdən ləğv edildiyini sübuta yetirməyə çalışsa da, FİFA Aosmanın lehinə qərar verdi. Qurumun qərarı ilə ankaralılar futbolçuya 198 min avro ödənməmiş maaş və 120 min avro təzminat olmaqla ümumilikdə 318 min avro ödəməli olacaqlar.

Maraqlıdı ki, Aosman eyni oyunu daha öncə ''Pendikspor''un da başına açmışdı. O, bu klubda da eyni problem yaşayınca, FİFA-ya müraciət etmiş və 125 min avro qazanmışdı. Bundan başqa ''Pendikspor''a 3 dönəm üçün transfer cəzası verilmişdi. Eyni cəzanın ''Gənclərbirliyi''nə verilməsi də gündəmdədi.