Bax, indi bu sətirləri yazanda da Ernesto Valverdenin “Qarabağ”la bağlı oyunçularına bu qədər əcaib tapşırıq verdiyinə qətiyyən inanmıram.

İllərin təcrübəsi, onlarla titulu olan mütəxəssis məntiqlə belə danışa bilməz. “Atletik”in baş məşqçisi futbolçularına "Qarabağ"ın qapısına mümkün qədər çox – hətta 9 top – vurmağı" tapşırırsa və bunu media önündə dilə gətirirsə, deməli, ən azı taktiki səhvə yol verir. Məgər hesablaya bilmir ki, bu açıqlama “Qarabağ”ın futbolçularının da qulağına çatacaq?! Ondan sonra artıq Qurban Qurbanovun yetirmələrinə nə taktiki incəliklər anlatması lazımdı, nə də oyunöncəsi motivasiya verməsi. Motivasiyanı Valverde verib də! “9 qol vurmağı tapşırmışam” deməklə bizimkiləri qıcıqlandırıb, dəliyə döndərib. İndi onlar “San-Mames”in qazonunu eşib dağıtsınlar, cənab Valverde, sən də yaxşı-yaxşı bax! Elə böyük səhv etmisən ki, izahı yoxdu.

Əslində “Qarabağ”ın qarşıdakı səfər oyunu ilə bağlı hədəfi məlumdu: imkan olsa, 3, ən azı 1 xalla dönmək. Prinsipcə 1 xalın da ağdamlıların “24-lüy”ə düşməsi baxımından önəmi böyükdü. Ümumiyyətlə, bu mərhələdə hər xal qızıl dəyərindədi. Özü də ilk iki oyunda 6 xal qazanan, “iştah diş altındadı” məsəlini unutmayan komanda üçün. Qurban bəy də “Kopenhagen” üzərindəki qələbədən sonra bir qədər ehtiyatlı şəkildə xalla bağlı hesab-kitab aparmağa başladı.

Və indi biz Bilbaoya yollanırıq. Onsuz da gücümüzə əminik. Valverde isə belə axmaq açıqlama ilə arı yuvasına çöp etdi, “Qarabağ”ın gücünə qəzəb də qatdı. Gücün üzərinə qəzəb də gələndə bir komandanın qarşısını almaq qat-qat çətin olur. Dəhşətli dərəcədə əminəm ki, oktyabrın 22-si axşam “San-Mames”in qazonuna çıxacaq hər bir “Qarabağ” oyunçusunun ürəyindən Valverdenin dayandığı yerə yaxınlaşmaq və ona “9 qol vurmayanın atasına lənət” demək keçəcək. Onlar deməsə də, mən indidən deyirəm: 9 qol vurmayanın atasına lənət! Bacarırsızsa, vurun!

HUŞƏNG