Lamin Yamal bu gün dünya futbolunun şəksiz-şübhəsiz bir nömrəli ulduzudu.

Bu o anlama gəlməsin ki, Lamin sabit şəkildə bütün başqa futbolçuları yaşıl meydanda daim arxada qoyur və ya yaxın illərdə bir neçə “Qızıl top” qazanacaq. Yox, sadəcə, onun fenomenal oyununun arxasında həm də idmana daxil olmayan bir sürü məsələ dayanır. Özü də heç də həmişə pozitiv olmayan.

İndi planetdə bu qədər fəal və detallı şəkildə müzakirə olunan bir başqa futbolçu yoxdu. Demək lazımdı ki, məhz Lamin özü onunla bağlı müzakirələr üçün müntəzəm mövzular verir. Cırtdanlarla gecə məclisi, müxtəlif qızlarla görüşlərin təqvimi, sosial şəbəkələrdə qıcıqlandırıcı paylaşımlar – bunlar Yamalla bağlı olan önəmli hadisələrin bir hissəsidi.

Qəribə zədə və klubla yığma arasındakı münaqişə
Təbii ki, Lamin ətrafında daim onun birbaşa iştirakı olmayan hadisələr də baş verir. Məsələn, oktyabrın əvvəlində əməlli-başlı qalmaqal qopdu – “Barselona” ilə İspaniya yığması üz-üzə gəldi. Hər şey Yamala görədi. Sentyabrdakı beynəlxalq fasilənin ardından gənc istedadın qasıq zədəsindən əziyyət çəkdiyi aydın oldu. Artıq onda kataloniyalıların baş məşqçisi Hans-Diter Flik kimi günahkar saydığını elan etdi:

Ulduzun dəqiq bərpa müddəti açıqlanmasa da, “Valensiya” və “Nyukasl” ilə oyunlarda meydanda görünməsi istisna olunurdu. Nəticədə o, hətta “Xetafe” və “Ovyedo” ilə oyunları da buraxaraq yaşıl meydana yalnız sentyabrın 28-də döndü. “Real Sosyedad”la oyunda sonradan meydana çıxdı və Levandovskinin qələbə qolunun ötürməsini verdi. Ardından vinger Çempionlar Liqası çərçivəsində PSJ-yə qarşı da oynadı, özü də 90 dəqiqə.
Belədə düşünmək olardı ki, De la Fuentenin futbolçunu milli komandanın oktyabr toplanışında heyətə çağırmaq üçün bütün əsasları var – Lamin sağalıb, klubun heyətində tam oyun keçirib.

Yığmanın baş məşqçisi də belə etdi, Yamalı çağırdı, dünya çempionatının seçmə mərhələsinin Gürcüstan və Bolqarıstan ilə oyunlarında ona bel bağladığını göstərdi. Yalnız bir nüans var: insaydlara inansaq, Lamin yığmanın baş məşqçisi ilə əlaqə saxlayaraq ona qasıq nahiyəsində hələ də narahatlıq hiss etdiyini çatdırıb.

Laminin niyyəti aydındı – dincəlmək və eyni zamanda müalicəni başa çatdırmaq istəyirdi, nəinki yığmanın heyətində iki oyunda görünmək. Ancaq De la Fuente qəti mövqe seçdi: “Barsa”da oyuna çıxırsansa, yığmanın da formasını geyməlisən! Kataloniyalıların idman direktoru Dekunun müdaxiləsi də işə yaramadı. Yığmanın baş məşqçisi hətta Flikin bir qədər əvvəl tanış olduğunuz açıqlamasına da sərt cavab verdi: “mənim üçün fərqi yoxdu”. Razılaşaq ki, Avropa çempionlarının baş məşqçisi sərt və müəyyən dərəcədə aqressiv yanaşma göstərdi.

Bu münaqişədə milli komandanın dominant tərəf kimi görünməsini istəməyən “Barselona” Yamalın köhnə zədəsini yenilədiyini açıqlamaqla daha bir qəribə gediş etdi. De la Fuente bundan sonra Lamini oktyabr toplanışı üçün yekun heyətdən çıxarmağa məcbur oldu. Ancaq Kataloniya klubu bununla özünə də zərbə vurdu: axı komandanın lideri “Sevilya” ilə çempionat oyununu buraxmalı oldu və əndəlüslər Flikin yetirmələrini darmadağın etdi – 4:1. Rafinyanın da zədədən əziyyət çəkdiyini nəzərə alsaq, Yamal ətrafındakı tibbi intriqalar heç yerinə düşmür. “Barsa” ardıcıl iki oyunda uduzdu, La Liqada liderliyi yenidən əldən verdi və belə görünür ki, böhran yaşayır. “Sevilya” ilə həmin oyunda Flik Yamalın yoxluğunu açıq-aşkar hiss etdi. Məhz Lamin kataloniyalıların sadəlövh hücumlarını canlandıra bilərdi.

Yamal üçün hansı fəsadlar olacaq?
İndiki durumda münaqişənin bütün iştirakçılarını anlamaq olar. “Barselona” belə hesab edir ki, əsas ulduzunun heç bir bəraəti olmayan riskə atılması doğru deyil. Milli komandanın rəhbərliyi isə istisnasız öz maraqları çərçivəsində hərəkət edir. Gerçəkdən də De la Fuentenin nə vecinə ki, hansı komanda La Liqanın turnir cədvəlinin zirvəsində qərarlaşıb, kimin neçə xalı var? O, hazırda ən yaxşı formada olan ispan futbolçuları çağırır, qalan məqamlar isə önəmli deyil.

Nəticədə bütün tərəflər ziyan çəkir. “Barsa” sərəncamında tam sağlam olmayan oyunçunu görür, İspaniya yığması hücumun liderinin əməyindən məhrum olur, Yamal özü isə bütün tərəflərdən əlavə təzyiqlə üzləşir. Yox, əlbəttə, belə durum Lamini sözün yaxşı mənasında qıcıqlandıra da bilər. Ancaq ideal dünyada idmançının mental rahatlığı üçün bütün şərtlər təmin olunur ki, o, yalnız oyuna köklənə bilsin. Bu məqamda osə 18 yaşlı yeniyetmə pressinq altına düşüb.

Yamala, daha dəqiqi, onun böyük və parlaq gələcəyinə görə narahatlıq keçirməyə dəyər. Klubun və milli komandanın çılğın şəkildə Yamalın istedadından yararlanmağa çalışdığı məqamda futbolçu özü açıq-aydın çəkir. Bəlkə də bunun fərqinə varmadan. Fiziki yükləmə, funksionerlərin beyninin məhsulu olan müntəzəm psixoloji oyunlar, dünyadakı idmançıların 99 faizinin üzərində olmayan nəhəng təzyiq - bütün bu çətinliklər Laminin potensialının sarsıda bilər. Onun bu yükün altından çıxa biləcəyinə inanmaq istərdik. Və görünür, heç kim Laminə yardım etməyəcək. Heç buna borclu da deyillər.