“Avropanın iyrənc siyasətinin oyunlarıdı ki, belə faşist hakimi bizim oyuna təyin ediblər” – bu, yığmanı başqa ölkələrdə dəstəkləyən “Milli Dəstə”nin Ukrayna ilə oyundan sonra sosiaı şəbəkə hesabında yazdığı cümlədi.

“Milli Dəstə”nin hakimin milli mənsubiyyətinə işarə edib-etmədiyini bilmirik. Axı avstriyalılarla almanlar bir-birinə qohum, yaxın xalq sayılır.

Bəs avstriyalı Sebastyan Qishamer dünən nə dərəcədə ədalətli idi?

Birinci hissədə bir neçə dəfə aşkar sarı vərəqəlik epizod oldu ki, referi fitini səsləndirdi, amma vərəqə vermədi. Hissənin sonunda Malinovski açıq ayağını qaldırıb Emin Mahmudovun başına zərbə endirdi. Referi bunu, sadəcə, sarı vərəqə kimi dəyərləndirdi. Əslində VAR çağırmışdı, amma bu heç nəyi dəyişmədi.

İkinci hissədə də xeyli şübhəli epizod oldu. Amma əsas məqam başqadı. Aşkar görünürdü ki, oyunun sonlarında millimiz təzyiqi xeyli artırıb, çox istəklidi. 90-cı dəqiqənin tamamına bir dəqiqə qalmış Abdulax yerdə qaldı. VAR-a baxıldı, həkimlər meydana çıxdı, 3 dəqiqə yarım vaxt getdı. Artırılmış 2 dəqiqənin tamamında, 27 saniyə keçmiş oyun bərpa olundu. İkinci hissəyə isə 5 dəqiqə artırılmışdı. Amma Qishamer 5 dəqiqənin tamamında final fitini səsləndirdi. Bunun adının nə olduğunu deyə bilmirəm. Amma avstriyalı referinin bizə qarşı etdikləri faşizm olmasa da, böyük ədalətsizlik idi!

MÜZƏFFƏR QULUZADƏ