AÇ-2024-ün 1/4 finalçısı Türkiyə yığmasının DÇ-2026-nın seçmə mərhələsi macərası sentyabrda start götürəcək.

''Football-plus.az'' xəbər verir ki, ''ay-ulduzlular'' İspaniya, Gürcüstan və Bolqarıstan ilə eyni qrupda yer alır.

Vinçentso Montellanın komandası üçün seçmə mərhələ sentyabrın 4-də səfərdə Gürcüstana qarşı oyunla başlayacaq. Sentyabrın 7-də isə qardaş ölkənin komandası doğma fanatları önündə son Avropa çempionu İspaniyanı qəbul edəcək.

Bu arada bu qarşılaşmanın məkanı bəlli olub. Türkiyə Futbol Federasiyasından verilən rəsmi açıqlamada oyunun Konyada yerləşən ''Böyükşəhər Bələdiyə Stadionu''nda keçiriləcəyi açıqlanıb. Futbol topu şəklində dizayn edilən, 2014-cü ildə istifadəyə verilən bu arena 42 azarkeş tutumuna malikdi.

Bu stadionu ümumilikdə Türkiyə yığması üçün uğurlu saymaq olar. Belə ki, komanda indiyə qədər burda keçirdiyi 8 qarşılaşmadan 4 qələbə, 2 heç-heçə, 2 məğlubiyyətlə ayrılıb (top fərqi - 15:7). Özü də Türkiyə məhz bu stadionda bir sıra tarixi qələbələr qazanıb. AÇ-2016-nın seçmə mərhələsində Niderland (3:0) və İslandiya (1:0) üzərində vacib qələbələr bu arenada əldə olunmuşdu.

Bundan başqa Türkiyə 2019-un iyununda tarixində ilk dəfə Fransanı məhz bu stadionda məğlub etmişdi (2:0).